Paulus wa tja: “Ami mOmatwako mba ṱira Omatwako, kokutja mbi kare nomuinyo mu Ndjambi.”—Gal. 2:19.

Imbi Paulus mbya tjanga vya ri ohunga nepu enanḓengu nda tjivisa kozombongo moGalatie, morukondwa rwa Roma. Ovakriste tjiva moruveze ndwo va pukisirwe i yovahonge voposyo. Ovahonge mbo aave hongo kutja omundu ma yenene okumuna ondjamo indu tja kongorere Omatwako wa Moses, tjinene nge notjiṋa nomasukarisiro. Nungwari, Paulus aa tjiwa kutja Mukuru kaa undjire ko rukwao kutja ovakarere ve ve sukarisiwe. Eye momuano omukahu wa raisa kutja omahongero ngo ya ri posyo, nu we kurisa ongamburiro yovakambure ovakwao motjisuta tjonguturiro tja Jesus Kristus.—Gal. 2:4; 5:2.

Ombeibela i hungira oukahu kutja omundu tja koka katjiwa otjiṋa poo kaṱunwa i yoviṋa ongondoroka na ye. (Omuzuv. 9:5) Indu Paulus tja tja: “Ami mba ṱira Omatwako,” aa hee kutja Omatwako wa Moses kaye tji nouvara kombanda ye rukwao. Nungwari, Paulus aa tjiwa kutja ongamburiro ye motjisuta tjonguturiro ondji mai tjiti kutja ma kare “nomuinyo mu Ndjambi.”

“Omatwako” onga tjita kutja Paulus ma rundurure oumune we. Omomuano uṋe? Eye wa kahurura kutja “omundu ka varwa otja omusemba komurungu wa Ndjambi mena rokuyenenisa Omatwako wa Moses, nungwari u varwa otja omusemba mena rongamburiro mu Jesus Kristus porwayo.” (Gal. 2:16) Kunao, Omatwako ya yenenisa otjiṋa otjinanḓengu tjinene. Paulus wa kahurura kOvagalate kutja, “Owo ya wezirwa okuraisa kutja omasa wouvi ye ṱeki pi. Owo ya tyerwa okukarerera nga ondekurona ya Abraham, ku kwa tjitirwe inga omakwizikiro, tji ye ya.” (Gal. 3:19) Omatwako ya raisa oukahu kutja ovandu mbe he ri ohomonena nu ovanauvi, kaave yenene okuyeṱakamisa nawa nu owo aave hepa ombunguhiro ndji mai ve kutura nga aruhe. Kunao Omatwako ya vatera ovandu okutjiwa kutja Jesus ongwa ri Kristus, indji “ondekurona.” Omundu tja raisa ongamburiro mu Jesus Kristus, eye u yenena okuvarwa otjomusemba komurungu wa Ndjambi. (Gal. 3:24) Paulus wa yenena okuyakura nokukara nongamburiro mu Jesus mena rOmatwako wa Moses. Kunao Paulus wa “ṱira Omatwako” kokutja ma kare “nomuinyo mu Ndjambi.” Omatwako kaya ri nouvara kombanda ye rukwao, nungwari Mukuru ongwa ri nouvara kombanda ye.

Paulus wa raisa oumune otjingewo morutuu rwe kOvaroma. Eye wa tja: “Neṋe tjinga amu ri ouṋepo worutu rwa Kristus, otjinga amwa ṱa . . . Nungwari nambano eṱe twa kuturwa kOmatwako wa Moses, orondu tjinga atwa ṱa nu atu he tji ri kehi yOmatwako nge tu pandekere.” (Rom. 7:4, 6) Omambo ngo na inga nge ri mOvagalate 2:19, ye raisa kutja Paulus kaa hungire ohunga nokukoka otjomurunde kehi yOmatwako wa Moses. Nungwari, eye aa hungire ohunga nokukuturwa. Omatwako wa Moses kaya ri nouvara kombanda ye rukwao, nOvakriste varwe mba kuturwa mena rongamburiro ndji va ri na yo motjisuta tjonguturiro tja Kristus.