Nitura ni Pablo: “Nu meyannung ta Dob, neyarig ngà tu natay ngana anna i Dob mismu i namapatay niakan tapenu mattolay ngà nga masserbi ta Dios.”​—Gal. 2:19.

Egga i koneksion natun nga nitura ni Pablo ta pinakapunto nga kayàna nga ikagi ta kongregasion ira ta Galacia nga egga ta pammaguray na Romano. Nainfluwensian i karuan nga Cristiano tatun ta falsu ira nga gumattuddu. Ituttuddu natun nga totolay nga mawag tu tuttulan na tadday i ngamin nga ikikkiddaw na Mosaiko nga Dob, mas ngana i pakkugi tapenu mapaliag yayya. Ngem ammu ni Pablo nga ari ngana nga ikikkiddaw na Dios nga makugi danuri mangurug nisa. Yayya nga mafuersa nga kinontra ni Pablo yatun nga falsu nga tuttuddu anna pinasikanna i pangurug na wawwaragina ta sakrifisio nga tavvu ni Jesu-Cristo.​—Gal. 2:4; 5:2.

Mananawag i kagian na Biblia nga nu matay i tadday nga tolay, awan ngana vuluvuga tu ammuna, ni tu mafektan paga yayya na maski anni nga egga ta pallevuna. (Ecl. 9:5) Turi ta kinagi gafu ni Pablo nga ‘neyarig ngà tu natay ngana nu meyannung ta Dob,’ kayàna kagian nga awan ngana tu efekto nisa na Mosaiko nga Dob. Siguradu lallagu si Pablo nga ‘mattolay yayya nga masserbi ta Dios’ megafu ta pangurugna ta sakrifisio nga tavvu.

Inuli na Dob i situasion ni Pablo. Kunnasi? Nipakanawagna nga “i tolay ay mapakatunung gafu ta angngurug laman kani Jesu-Cristo, ari tu gafu ta pamarulo ta ipakua na Dob.” (Gal. 2:16) Kurug gapa tu egga i importante nga netuppal na Dob ngem kunnaw i kinagi ni Pablo ta taga-Galacia ira: “Neyammung laman yaw tapenu mepasingan na tu marakay i katagarulian. Ngem adde laman yaw ta gaka ni Abraham nga neyawatan na tabba.” (Gal. 3:19) Megafu ta Dob, nasingan nga ari nga perfekto nga matuttul na minattagaruli nga totolay i Dob anna kawagadda i ultimu anna perfekto nga sakrifisio. Yayya nga nipalippawa na Dob ta totolay nga si Jesus “i gaka.” Nu mangurug i tolay kani Jesu-Cristo, mapakatunung yayya ta arubang na Dios. (Gal. 3:24) Nakagi ni Pablo yatun megafu ta inaksepta anna kinurugna si Jesus megafu ta Dob. Yayya nga ‘neyarig tu natay ngana si Pablo nu meyannung ta Dob’ anna ‘mattolay ngana nga masserbi ta Dios.’ Ari ngana gafu tu i Dob i tuttulanna, nu ari, i Dios.

Kunnatun gapa i mensahe ni Pablo ta turana ta taga-Roma ira: “Wawwagì ira. Nu meyannung ta Dob, natay kamu ngana megafu ta parte nakamu na baggi ni Cristo . . . Napalubbangan ittam ngana ta pakawayya na Dob, ta natay ittam ngana ta nefukutat-tam nga katagarulian.” (Roma 7:4, 6) Tatun nga nitura ni Pablo anna ta Galacia 2:19, arianna nga tukuyan i kapapatay na minattagaruli nga tolay segun ta Dob. Tukuyanna tatun i kapalubbang. Awan ngana gafu tu pakawayya na Dob nisa anna ta tanakuan nga Cristiano ta napalubbangan ngana gapa ira megafu ta pangurugda ta sakrifisio nga tavvu ni Cristo.