Insurat ni Pablo: “Babaen ti linteg, natayak para iti linteg, tapno agbiagak para iti Dios.”—Gal. 2:19.

Ti insurat ni Pablo ket maitunos iti kangrunaan a punto a kayatna nga ibaga kadagiti kongregasion idiay Galacia, a probinsia idi ti Roma. Dadduma a Kristiano sadiay ket naimpluensiaan kadagiti ulbod a mannursuro. Isursuro dagita a tattao a tapno maisalakan ti maysa masapul a surotenna dagiti ipapaannurot ti Mosaiko a Linteg, nangnangruna ti panagpakugit. Ngem ammo ni Pablo a saanen a kidkiddawen ti Dios a makugit dagiti manamati. Babaen ti nabileg a pannakirinnasonna, kinontrana dagiti ulbod a sursuro ken pinabilegna ti pammati dagiti kakabsat maipapan iti daton a subbot ni Jesu-Kristo.—Gal. 2:4; 5:2.

Nalawag nga ibagbaga ti Biblia a no natayen ti maysa a tao, awanen ti puotna ken saanen a maapektaran iti aniaman a banag nga adda iti aglawlawna. (Ecl. 9:5) Idi imbaga ni Pablo: “Natayak para iti linteg,” kayatna a sawen nga awan isunan iti sidong ti Mosaiko a Linteg. Imbes ketdi, sigurado ni Pablo a gapu iti pammatina iti daton a subbot, ‘nagbiag para iti Dios.’

Napasamak daytoy a panagbalbaliw iti kasasaad ni Pablo “babaen ti linteg.” Kasano? Kalkalpasna laeng idi a nailawlawag a “ti maysa a tao ket maideklara a nalinteg, saan a babaen kadagiti aramid nga ipapaannurot ti linteg, no di ket babaen laeng ti pammati ken Jesu-Kristo.” (Gal. 2:16) Adda ngamin nakapatpateg a naitungpal ti Linteg. Inlawlawag ni Pablo kadagiti taga-Galacia: “Nainayon dayta tapno maipakita dagiti salungasing, agingga a dumteng ti kaputotan a nakaitedan ti kari.” (Gal. 3:19) Wen, pinagminar ti Linteg a dagiti imperpekto ken managbasol a tattao ket saanda a masurot ti intero a Linteg isu a kasapulanda ti maudi ken perpekto a daton. No kasta, ti Linteg inturongna dagiti tattao iti “kaputotan,” ti Kristo. No ipakita ti maysa ti pammatina ken Jesu-Kristo, ideklara isuna ti Dios a nalinteg. (Gal. 3:24) Kasta ti napasamak ken Pablo ta babaen ti Linteg, inawatna ni Jesus ken namati kenkuana. Sipud idin, makuna a “natay [ni Pablo] para iti linteg” ken ‘nagbiag para iti Dios.’ Isu ket awanen iti sidong ti Linteg, no di ket iwanwanwanen ti Dios.

Kasta met laeng a kapanunotan ti imbaga ni Pablo iti suratna kadagiti taga-Roma. “Kakabsatko, napagbalinkayo met a natay iti Linteg babaen ti bagi ti Kristo . . . Nawayawayaantayon iti Linteg, ta nataytayon iti dayta a nanglapped kadatayo.” (Roma 7:4, 6) Ipakita daytoy a teksto ken ti Galacia 2:19 a saan a dakdakamaten ni Pablo ti ipapatay kas nakondenar a managbasol iti sidong ti Linteg. Imbes ketdi, ti tuktukoyenna ket ti pannakawayawaya. Isu ken ti dadduma pay a Kristiano ket awanen iti sidong ti Linteg. Nawayawayaandan gapu iti pammatida iti subbot ni Jesu-Kristo.