Paul da gbẹn yọle: “Rẹ na bhi obọ uhi mẹn da yu nin uhi, nin mẹn da sabọ nyẹnlẹn nin Osẹnobulua.”​—Gal. 2:19.

Emhin nin Paul ha mhọn bhi ọkhọle diẹn mun emhin kpataki nin ọle gbẹn ọbhi ilẹta je ha khian agbotu kẹkẹ ne ha ribhi Galatia. Iman-emhin ohoghe nin ẹbho ha man da rẹso iKristiẹn eso bhi enin. Ene ẹbho nan da ha man ẹbho le ghe, nin ele da sabọ miẹn umiẹnfan, ọkhẹke nin ele ha re obọ rẹkhan Uhi nin Osẹnobulua na bhi obọ iMoses gbe, manman nọn rẹji ẹmhọn uruẹmhin. Paul lẹnmhin ghe, ọ iyẹ yi oko ghe Kristiẹn dẹ ruẹmhin. Ọle da dọnmhegbe rẹkpa ibhio ọle nin ele ko ga rẹ lẹn ghe, ene iman-emhin nan bha gba. Ọle da yẹ ziẹn urẹọbhọ nin ele mhọn da izọese nọnsi Jesu.​—Gal. 2:4; 5:2.

Baibo ji mhan lẹn ghe, ọria ha yu, ọle bha lẹn emhin soso. (Eccl. 9:5) Ẹghe nin Paul rẹ yọle: “Mẹn yu nin uhi,” ebi ọle ha tẹmhọnlẹn hi, uhi nin Osẹnobulua na bhi obọ iMoses gbe bha yẹ miẹn eji ọ da rẹso ọle. Paul lẹnmhin ghe, ranmhude urẹọbhọ nin ọle mhọn da izọese nọnsi Jesu, ọle zẹle nin ọle “da sabọ nyẹnlẹn nin Osẹnobulua.”

Ọne Uhi zẹle nin idia nin Paul ha ye da fidenọ. Be ọnan rẹ sunu yẹ? Paul wo la rẹman ghe, “ọria ha mhọn urẹọbhọ da iJesu Kristi, ọle ọkpa a da tie ọle ọria nọn khiale, ọ iyi sade ọle wẹnna rẹkhan uhi.” (Gal. 2:16) Gene-gene, ọne Uhi wo miẹn emhin kpataki nọn lu. Paul da taman ibhokhan Galatians yọle: “A re ọle ba ọle nan da ha lẹn olukhọ, ọkuẹsẹ ọne ọmọn nan ve ive ọle vae; a da re ọle na bhi obọ ene ẹhi yẹ re ọle na bhi obọ ọsuọnmhan.” (Gal. 3:19) Ọne Uhi da wo re ọle man ghe, eria olukhọ ida wo sabọ re obọ rẹkhan ọne Uhi tee, ghe ebi ele guanọ hi, izọese nọn gbale. Bhiriọ, ọne Uhi da rẹkpa ẹbho rẹ lẹn ghe, Jesu hi “Ọne ọmọn.” Ọria ha mhọn urẹọbhọ da izọese nọnsi Jesu Kristi, ọle ki dọ ha yi ọria nọn khiale bhi ẹlo nọnsi Osẹnobulua. (Gal. 3:24) Paul da kiẹn ọria nọn khiale bhi ẹlo nọnsi Osẹnobulua, ranmhude rẹ na obọ ọne Uhi, ọle da miẹn iJesu ọbhi egbe, yẹ mhọn urẹọbhọ da ọle. Bhiriọ, Paul da “yu nin uhi,” yẹ “nyẹnlẹn nin Osẹnobulua.” Ọne uhi bha yẹ miẹn ije soso nọn da rẹso ọle. Ọkpakinọn, Osẹnobulua hi ọnọn ki mhọn obọ bhi egbe ọle.

Paul da yẹ gbẹn emhin nọn sẹ inian ọbhi ilẹta je iKristiẹn ne ribhi Rome. Ọle da yọle: “Ibhio mẹn, rẹ na bhi egbe nọnsi Kristi, ibha rebhe yulu rẹji ọne Uhi . . . A fan mhan fia bhi obọ ọne Uhi, ranmhude mhan yu rẹji ebe rẹ ha mun mhan mhọnlẹn.” (Rom. 7:​4, 6) Ọta nin Paul ta bhi enan, bi ọne ọle ta bhi Galatians 2:​19, bha rẹman uyumhin nin ọluemhin-ọbe ha yu ranmhude ọle gbobọrauhi. Ọkpakinọn, ebi ọle ha tẹmhọnlẹn hi, nan rẹ fan ọria fia. Bhiriọ, ọne Uhi bha yẹ miẹn eji ọ da rẹso ọle, bi ẹbho nekẹle ne diabe ọle. Ele da kiẹn ẹbho nan fan fia ranmhude urẹọbhọ nin ele mhọn da izọese nọnsi Jesu.