“Ngai gaw Karai Kasang hta e hkrung nga n ga, dai jep ai tara hte seng ai hta, jep ai tara a gawp e ngai si nga nngai” ngu Pawlu ka wa ai.​—Gal 2:19.

Pawlu ka wa ai ndai laika gaw, Roma ginwang hta nga ai Galati nawku hpung ni hpe tsun dan ai madung lam hte matut mahkai nga ai. Dai hta nga ai Hkristan nkau gaw, shut shai ai sara ni a shingkang ka-up hkrum nga ai. Dai sara ni gaw, hkye hkrang la hkrum na matu, matu gadoi ra ai ngu ai Mawshe a tara hta hpyi shawn da ai lam hpe hkan sa ra ai ngu sharin ya ai. Raitim, matu gadoi na matu Hkristan ni hpe Karai Kasang n hpyi shawn da sai lam Pawlu chye ai. Pawlu gaw, kam ai myit hte dai lam hpe sawn dinglik dan nna, shut shai ai sharin achyin lam hpe nyet kau ai. Ngut nna Hkristu Yesu a gawng malai hkungga hpe hpunau ni kam hkra karum ya wa ai.​—Gal 2:4; 5:2.

Masha langai gaw si mat sai nga yang, hpa hpe mung n chye ai (sh) shi a makau hta byin ai lam a majaw mung hkra machyi ai lam ni n nga ai ngu Chyum Laika hta asan sha tsun da ai. (Hpj 9:5) “Jep ai tara a gawp e ngai si nga nngai” ngu Pawlu tsun ai shaloi, Mawshe a Tara gaw shi hpe akyu n shabyin ya lu sai ngu tsun mayu ai re. Gawng malai hkungga hpe kam ai shi a makam masham a majaw, “Karai Kasang hta e hkrung nga” ai lam Pawlu teng sha kam wa ai.

“Jep ai tara” gaw Pawlu a masa lam ni hpe galai shai ya wa ai. Gara hku nna kun? “Hkristu Yesu a makam masham hta sha ding hpring lu ai gaw, anhte chye nga ga ai majaw, jep ai tara a magam bungli hte n rai” ngu nna shi sanglang dan wa ai. (Gal 2:16) Jep ai tara gaw grai ahkyak ai daw hta lawm ai. Galati nawku hpung hpang de Pawlu ndai hku sanglang dan wa ai: “Jep ai Tara hpe Karai Kasang jat bang tawn da ya ai lam gaw shut hpyit yubak mara ni a masa lam hpe shapraw dan na matu rai nna dai gaw, ga ndat da ai . . . aru arat wa garai n du ai aten laman du hkra sha grin nga na matu rai nga ai.” (Gal 3:19, JCLB) N hkum tsup nna yubak kap ai shinggyim masha ni gaw, tara hpe hpring tup n hkan sa lu ai lam Jep ai Tara gaw madun dan ai. Hpang jahtum hta, hkum tsup ai hkungga nawng ra na hpe shadum ya ai. “Aru arat” wa gaw Hkristu re ai hpe Jep ai Tara gaw chye shangun ai. Hkristu hpe kamsham ai nga yang, anhte hpe ding hpring ai wa ngu nna Karai Kasang masat ya ai hpe hkrum na re. (Gal 3:24) Pawlu gaw Jep ai Tara hpe hkap la nna Yesu hpe kamsham ai majaw, ding hpring ai ngu masat hkrum ai. Dai majaw Pawlu gaw, “jep ai tara a gawp . . . si” nna, “Karai Kasang hta e hkrung nga” ai. Shi hpe hkang ai gaw Jep ai Tara n rai sai sha, Karai Kasang rai mat sai.

Roma de shagun ai laika hta mung dai zawn tsun wa ai. “Hpu nau ni e, . . . nanhte mung Hkristu a hkum hkrang hta e si mat ai hkrum nna, jep ai tara hte daw hka wa ma nit dai. . . . si mat hkrum ai hte anhte hpe sharen da ai baw hta na daw hka wa yang, jep ai tara kaw na shalawt dat ai anhte hkrum saga ai.” (Rom 7:4, 6) Ndai Chyum daw hte Galati 2:19 gaw, Jep ai Tara hta jeyang hkrum nna si mat ai hpe Pawlu tsun ai n re ai lam dan dawng ai. De a malai, lawt lu lam lu mat sai hpe tsun ai re. Jep ai Tara gaw, shi hte hpawn, shi zawn re ai kadai hpe mung n hkang lu sai. Shanhte gaw Hkristu a gawng malai hkungga hpe kam ai majaw lawt lu sai.