Vaulo aandĩkie: “Kwĩsĩla mĩao nĩnakwie maũndũnĩ ma mĩao, nĩ kana nĩthĩwe thayũ kwondũ wa Ngai.”—Aka. 2:19.

Kĩu Vaulo waandĩkie nĩkyosanĩte na ũndũ wa vata ũla wendaa ikundi ila syaĩ kĩsionĩ kya Kalatia, kĩla kyasumbĩkĩtwe nĩ Lomi, imanye. Aklĩsto amwe ikundinĩ isu nĩmaaĩtw’e nĩ alimũ ma ũvũngũ. Alimũ asu mamanyĩasya kana mũndũ enda kũtangĩĩwa, no nginya aatĩĩe Mĩao ya Mose, na mũno mũno ĩũlũ wa nzaĩko. Ĩndĩ Vaulo nĩweesĩ kana Ngai ndendaa etĩkĩli maĩkwe. Nũndũ wa ũu, nĩwaĩkĩĩthisye ana-a-asa vyũ kana momanyĩsyo asu maĩ ma ũvũngũ, na alũlũmĩĩlya mũĩkĩĩo woo nthĩnĩ wa nthembo ya wovosyo ya Yesũ Klĩsto.—Aka. 2:4; 5:2.

Mbivilia nĩyonanĩtye ũtheinĩ kana yĩla mũndũ wakw’a, ndethĩawa esĩ maũndũ ala mamũthyũlũlũkĩte, o na mayĩthĩawa matonya kũmũũmĩsya kana kũmũtethya. (Mũta. 9:5) Kwoou yĩla Vaulo waisye: “Nĩnakwie maũndũnĩ ma mĩao,” oonanasya kana ndoovetwe nĩ Mĩao ya Mose. Yu nũndũ nĩwaĩkĩĩe vyũ nthembo ya wovosyo, nĩweethĩiwe “thayũ kwondũ wa Ngai.”

Vaulo akwatĩte ũalyũku ũsu “kwĩsĩla mĩao.” Ata? Atanamba kũweta ndeto isu aĩ anauma kũweta kana “mũndũ ndatalĩlawa ũlũngalu nũndũ wa kwĩka mawĩa ala mĩao ĩwetete, ĩndĩ nũndũ wa mũĩkĩĩo nthĩnĩ wa Yesũ Klĩsto.” (Aka. 2:16) Vate nzika, Mĩao nĩyeanĩĩtye ũndũ wa vata. Vaulo aeleisye Akalatia ũũ: “Mĩao yanenganiwe nĩ kana yonany’e mavĩtyo nginya ũsyao ũla wanengetwe watho ũsu ũvike.” (Aka. 3:19) Kwa w’o, Mĩao yatumaa andũ mona nesa kana maitonya kũmĩatĩĩa mateũvĩtany’a nũndũ nĩ ene naĩ, na me na vata wa nthembo ya mũthya ĩte na naĩ. Kwoou, Mĩao nĩyo yatongoesye andũ kwa ũla “ũsyao,” kana Klĩsto. Na nũndũ wa ũu, mũndũ aĩkĩĩa Yesũ Klĩsto, aĩ atonya kũtalwa ta mũlũngalu nĩ Ngai. (Aka. 3:24) Mĩao nĩyo yatumĩte Vaulo amwĩtĩkĩla Yesũ na amũĩkĩĩa, na nũndũ wa ũu, atalĩlwa kwĩthĩwa mũlũngalu. Kwoou, ‘nĩwakw’ĩte maũndũnĩ ma mĩao’ na akethĩwa “thayũ kwondũ wa Ngai.” Yu Vaulo ndaĩ ungu wa ũkũmũ wa Mĩao, ĩndĩ aĩ ungu wa ũkũmũ wa Ngai.

Vaulo nĩwaeleisye ũndũ ta ũsu yĩla waandĩkĩaa Alomi valũa. Aisye: “Ana-a-asa, o nenyu nĩmwatwiwe akw’ũ kwa ĩla Mĩao kwĩsĩla mwĩĩ wa Klĩsto . . . Yu nĩtũthaĩtw’e kuma ĩla Mĩaonĩ, nũndũ nĩtwakwie maũndũnĩ ma kĩu kyatwovete.” (Alo. 7:4, 6) Ĩandĩkonĩ yĩu na ya Akalatia 2:19, kĩkw’ũ kĩla Vaulo waneeneaa ti kya mwĩki wa naĩ ũsilĩlwe kũawa nĩ Mĩao. Ĩndĩ we awetaa ĩũlũ wa ũthasyo. Yu we na Aklĩsto ala angĩ mayoovetwe nĩ Mĩao. Vandũ va ũu, nĩmathaĩtw’e nũndũ wa kũĩkĩĩa nthembo ya Klĩsto.