Polu skrebe: ‘Pamodi, através di Lei, N móre pa Lei, pa N pode vive pa Deus.’ — Gál. 2:19.

Kuzê ki Polu skrebe, sta di akordu ku kel pontu prinsipal ki el staba ta splika pa kes kongregason di pruvínsia di Galásia. Kes kriston di la, staba ta dexa alguns instrutor falsu influensia-s. Kes ómi li staba ta inxina ma pa un algen salva, el tinha ki sigiba Lei di Muizés, prinsipalmenti kel lei sobri sirkunsizon. Má Polu sabia ma Deus ka staba ta iziji más pa kristons faze sirkunsizon. El rasusina ku es pa konvense-s i pa prova ma kes ensinu éra falsu i el djuda kes kriston ten un fé más fórti na sakrifisiu di resgati di Jizus Kristu. — Gál. 2:4; 5:2.

Bíblia ta fla klaru ma óras ki un algen móre el ka ta sabe di más nada. Nada ki ta kontise na se vólta ka ta afeta-l. (Ecl. 9:5) Kantu Polu fla ‘N móre pa Lei’, el krê flaba ma el ka staba dibaxu di Lei di Muizés. Má, Polu tinha sertéza ma éra se fé na resgati ki ta djudaba el ‘vive pa Deus.’

Kel mudansa li na situason di Polu kontise ‘através di Lei’. Modi? Polu dja splikaba antis ma ‘ómi ka ta txomadu di justu pamodi óbras ki lei ta iziji, má sô através di fé na Jizus Kristu.’ (Gál. 2:16) Lei dja kunpriba un obijetivu rei di inportanti. Repara kuzê ki Polu fla kes kriston di Galásia: ‘El dadu pa pode konxedu pekadu, ti ki txigaba kel disendenti, ki fazedu kel promésa pa el’. (Gál. 3:19) Lei ta mostraba klaru ma algen inperfetu nunka ka ta konsigi obideseba lei di manera perfetu. Es mesteba di un sakrifisiu perfetu ki ta kubriba tudu ses pekadu. Na verdadi, lei djuda povu odja ma kel disendenti éra Jizus. Óras ki un algen ta mostraba fé na Jizus, el ta biraba un algen justu pa Deus. (Gál. 3:24) Polu bira justu pa Deus, pamodi através di Lei, el seta Jizus i el mostra fé na el. Pamodi kel-li, Polu ‘móre pa Lei’ i el ‘vive pa Deus’. Lei ka tinha ninhun puder más na vida di Polu, má Deus tinha.

Polu flaba un kuza kuazi sima kel-li na se karta pa romanus. El skrebe: ‘Nhas irmon, anhos tanbê nhos móre pa Lei, através di korpu di Kristu. . . dja nu libradu di Lei, pamodi nu móre pa kel kuza ki teneba nos prézu’. (Rom. 7:4, 6) Na kel testu li i na Gálatas 2:19, Polu ka staba ta pâpia di móre sima un pekador kondenadu pa Lei. Má el staba ta pâpia di ser libertadu. Nen Polu nen kes otu kriston ki libertadu pamodi fé na resgati di Jizus ka tinha ki obiba ku Lei más.