Polo sonikaka nde: “Na nzila ya nsiku mono fwaka na yina me tala nsiku, sambu mono vanda na luzingu na yina me tala Nzambi.”—Bag. 2:19.

Mambu yai ya Polo sonikaka vandaka kuwakana ti mambu ya mfunu yina yandi songaka Bakristu yina vandaka na mabundu ya Roma na Provense ya Galatia. Bakristu ya nkaka vandaka kundima mambu yina balongi ya luvunu vandaka kulonga. Balongi yina ya luvunu vandaka kulonga nde sambu na kuguluka, bantu fwete lemfuka na mambu yina Nsiku ya Moize vandaka kulomba mingi-mingi nsiku ya me tala luyotisu. Kansi Polo zabaka nde Nzambi vandaka diaka ve kulomba nde bansadi na yandi kulemfuka na nsiku ya me tala luyotisu. Yandi sadisaka Bakristu na kubakisa nde malongi yina vandaka malongi ya luvunu mpi Polo siamisaka bo na kukwikila na kimenga ya Yezu Kristu.—Bag. 2:4; 5:2.

Biblia ke tuba pwelele nde kana muntu me fwa, yandi ke zabaka diaka ve ata kima. (Lon. 9:5) Ntangu Polo tubaka nde: “Mono fwaka na yina me tala nsiku,” yandi zolaka kumonisa nde yandi vandaka diaka ve na nsi ya Nsiku ya Moize. Yo yina Polo zabaka mbote nde mutindu yandi vandaka kukwikila na kimenga ya Yezu, yandi ‘vandaka na luzingu na yina me tala Nzambi.’

Nsiku sobaka mambu ya nkaka na luzingu ya Polo. Inki mutindu? Yandi tubaka nde: “Nzambi ke ndimaka muntu bonso muntu ya lunungu na nzila ya bisalu ya nsiku ve, kansi kaka na nzila ya lukwikilu na Kristu Yezu.” (Bag. 2:16) Nsiku sadisaka Polo na kusala diambu mosi ya mfunu. Yo yina yandi songaka Bakristu ya Galatia nde: “Yandi yikaka yo sambu yo monisa mambu ya mbi pwelele, tii kuna mwana yina bo silaka yandi ta kwisa.” (Bag. 3:19) Ya kieleka, Nsiku monisaka pwelele nde bantu ya kukonda kukuka to bantu ya masumu lenda lemfuka ve na Nsiku na mutindu ya kukuka mpi yo lombaka nde muntu ya kukuka kufwa sambu na kupesa kimenga na yandi. Yo yina, Nsiku sadisaka bantu na kubakisa mbote nde Yezu vandaka “mwana yina bo silaka.” Sambu Nzambi kundima beto bonso bantu ya lunungu, beto fwete kwikila na Yezu Kristu. (Bag. 3:24) Polo tubaka mambu yai sambu yandi zabaka mbote nde Nsiku sadisaka yandi na kundima mpi na kukwikila na Yezu. Yo yina, yandi “fwaka na yina me tala nsiku” mpi yandi vandaka “na luzingu na yina me tala Nzambi.” Polo vandaka diaka ve na nsi ya Nsiku kansi yandi vandaka na nsi ya lutwadisu ya Nzambi.

Polo songaka mpi Bakristu ya Roma mambu yai. Yandi tubaka nde: “Bampangi na mono, beno mpi kumaka bantu ya kufwa na Nsiku na nzila ya nitu ya Kristu . . . Bo me katulaka beto na Nsiku, sambu beto me fwaka na kutadila kima yina vandaka kukanga beto.” (Bar. 7:4, 6) Verse yai mpi Bagalatia 2:19 ke monisa nde ntumwa Polo vandaka ve kutubila muntu yina me fwa sambu yandi fwaka Nsiku. Kansi yandi vandaka kumonisa nde yandi ti Bakristu ya nkaka vandaka diaka ve na nsi ya Nsiku sambu bo vandaka kukwikila na kimenga ya Yezu.