Paulus okwa ti: “Onda fya mo momhango okupitila momhango, opo ndi kale nomwenyo koshipala shaKalunga.” — Gal. 2:19.

Eendjovo odo Paulus a shanga oda pambafana naasho a popya momaongalo, oo e li moshitukulwalongo shaRoma muGalatia. Ovakriste vamwe moshitukulwa osho ova li va nwefwa mo kovahongi ovanaipupulu. Ovalumenhu va tya ngaho ova li hava hongo kutya, opo omunhu a ka xupifwe, oku na okudulika koiteelelwa yOmhango yaMoses, unene tuu okupita etanda. Ashike Paulus okwa li e shii kutya Kalunga ina teelela vali ovaitaveli va pite etanda. Okwa li a popya a tomhwa kutya omahongo oo oipupulu okwa puka nokwa kwafela ovamwaxe va kale ve na eitavelo la kola mekuliloyambo laJesus Kristus. — Gal. 2:4; 5:2.

Ombiibeli oya popya sha yela kutya omunhu ngeenge okwa fi, omadiladilo aye ihaa kala vali taa longo noita dulu okweetelwa oshiponga koshinima shonhumba shi li momudingonoko. (Omuud. 9:5) Eshi Paulus a ti: “Onda fya mo momhango,” okwa li a hala kutya ke li vali koshi yOmhango yaMoses. Ponhele yaasho, Paulus okwa li e shii kutya okukala e na eitavelo mekuliloyambo osho tashi mu kaleke “nomwenyo koshipala shaKalunga.”

Onghalo yaPaulus oya li ya lundululwa “okupitila momhango.” Ngahelipi mbela? Okwe shi yelifa eshi a popya kutya “omunhu iha talwa ko omuyuki omolwoilonga yomhango, ndele omolweitavelo laye muJesus Kristus.” (Gal. 2:16) Omhango oya li ya wanifa po oshinima shimwe sha fimanenena. Paulus okwa yelifila Ovagalati ta ti: “Oya li ya totwa po opo i holole omanyono fiyo oludalo olo la li la udanekwa le uya.” (Gal. 3:19) Onghee hano, Omhango oye shi yelifa nawa kutya ovanhu inava wanenena nove li ovalunde itava dulu okuwanifa po Omhango monghedi ya wanenena, ndele ova pumbwa eyambo la wanenena. Omhango oya kwafela ovanhu va mone kutya Kristus oye “oludalo.” Ovo ve na eitavelo muJesus Kristus, ova talika ko ovayuki koshipala shaKalunga. (Gal. 3:24) Paulus okwa talika ko omuyuki, molwaashi Omhango oyo ye mu kwafela a tambule ko Jesus noku mu itavela. Onghee hano, Paulus okwa li a “fya mo momhango” nokwa ninga ‘omwenyo koshipala shaKalunga.’ Paulus ka li vali ta wilikwa kOmhango, ndele okuKalunga.

Paulus okwa popya oshinima sha faafana monhumwafo yaye, oyo a li a shangela Ovaroma. Okwa ti: “Ovamwatate, omwa li koshi yOmhango, ndele omwa dja ko omolwekuliloyambo laKristus. . . . Paife katu li vali koshi yOmhango molwaashi hayo vali tai tu wilike.” (Rom. 7:4, 6) Omushangwa oo nosho yo Ovagalati 2:19, otava holola kutya Paulus ka li ta popi kombinga yokufya u li omulunde a tokolwa kOmhango. Ponhele yaasho, okwa li ta popi kombinga yokumangululwa. Onghee hano, Paulus ka li vali ta wilikwa kOmhango nosho yo Ovakriste vakwao, ovo ve mu fa. Ova li va mangululwa, molwaashi ove na eitavelo mekuliloyambo laKristus.