សំណួរពីអ្នកអាន
តើសាវ័កប៉ូលចង់មានន័យយ៉ាងណាពេលគាត់និយាយថា៖ «ដោយសារច្បាប់ ខ្ញុំបានស្លាប់ពីច្បាប់»?—កាឡ. ២:១៩, កំ.ស.
ប៉ូលបានសរសេរថា៖ «ដោយសារច្បាប់ ខ្ញុំបានស្លាប់ពីច្បាប់ ដើម្បីខ្ញុំអាចរស់ដើម្បីព្រះ»។—កាឡ. ២:១៩, កំ.ស.
អ្វីដែលប៉ូលបានសរសេរជាប់ទាក់ទងនឹងចំណុចដ៏សំខាន់មួយដែលគាត់បានលើកឡើងទៅក្រុមជំនុំផ្សេងៗនៅខេត្តកាឡាទីរបស់ជនជាតិរ៉ូម។ គ្រិស្តសាសនិកខ្លះនៅទីនោះទទួលឥទ្ធិពលពីអ្នកបង្រៀនមិនពិត។ បុរសបែបនេះបង្រៀនថាដើម្បីទទួលសេចក្ដីសង្គ្រោះ បុគ្គលម្នាក់ៗត្រូវធ្វើតាមច្បាប់ម៉ូសេ ជាពិសេសអំពីការកាត់ចុងស្បែក។ ប៉ុន្តែ ប៉ូលដឹងថាព្រះលែងតម្រូវឲ្យអ្នកជឿកាត់ចុងស្បែកទៀតហើយ។ ដោយវែកញែកយ៉ាងប៉ិនប្រសប់ គាត់បង្ហាញថាសេចក្ដីបង្រៀនទាំងនេះគឺមិនពិត ហើយបានពង្រឹងជំនឿរបស់បងប្អូនទៅលើគ្រឿងបូជាលោះរបស់លោកយេស៊ូគ្រិស្ត។—កាឡ. ២:៤; ៥:២
គម្ពីរចែងច្បាស់ថា ពេលមនុស្សស្លាប់ គាត់មិនដឹងអ្វីឬទទួលឥទ្ធិពលពីអ្វីដែលនៅជុំវិញគាត់ឡើយ។ (សាស្ដ. ៩:៥) ពេលប៉ូលនិយាយថា៖ «ខ្ញុំបានស្លាប់ពីច្បាប់» គាត់មានន័យថាច្បាប់ម៉ូសេលែងមានអំណាចលើគាត់។ ផ្ទុយទៅវិញ ប៉ូលជឿជាក់ថា ដោយមានជំនឿលើគ្រឿងបូជាលោះ គាត់«រស់ដើម្បីព្រះ»។
«ដោយសារច្បាប់» ស្ថានភាពរបស់ប៉ូលបានផ្លាស់ប្ដូរ។ តើតាមរបៀបណា? គាត់ទើបតែបានពន្យល់ថា៖ «មនុស្សបានត្រូវប្រកាសថាជាមនុស្សសុចរិត មិនមែនដោយអាងលើការប្រព្រឹត្តតាមច្បាប់ទេ តែតាមរយៈជំនឿលើគ្រិស្តយេស៊ូប៉ុណ្ណោះ»។ (កាឡ. ២:១៦) ច្បាប់ម៉ូសេបានសម្រេចអ្វីមួយដ៏សំខាន់ណាស់។ ប៉ូលបានពន្យល់បងប្អូននៅខេត្តកាឡាទីថា៖ «ច្បាប់នោះបានត្រូវបន្ថែមដើម្បីសឲ្យឃើញការរំលង រហូតដល់ពូជដែលបានទទួលសេចក្ដីសន្យាមកដល់»។ (កាឡ. ៣:១៩) មែនហើយ ច្បាប់នោះបង្ហាញយ៉ាងច្បាស់ថាមនុស្សមិនល្អឥតខ្ចោះដែលមានភាពខុសឆ្គង មិនអាចធ្វើតាមច្បាប់យ៉ាងល្អឥតខ្ចោះបានទេ ហើយថាពួកគេត្រូវការគ្រឿងបូជាដ៏ល្អឥតខ្ចោះមួយជាចុងក្រោយ។ ដូច្នេះ ច្បាប់នោះបានជួយមនុស្សឲ្យទទួលស្គាល់ថាលោកយេស៊ូគឺជា«ពូជ»។ ដោយបង្ហាញជំនឿលើលោកយេស៊ូគ្រិស្ត ព្រះអាចប្រកាសថាមនុស្សណាម្នាក់ជាមនុស្សសុចរិត។ (កាឡ. ៣:២៤) ប៉ូលបានត្រូវប្រកាសថាជាមនុស្សសុចរិត ដោយសារតាមរយៈច្បាប់គាត់ទទួលយកនិងមានជំនឿលើលោកយេស៊ូ។ យ៉ាងនេះ ប៉ូល«បានស្លាប់ពីច្បាប់» ហើយបាន«រស់ដើម្បីព្រះ»។ ច្បាប់នោះលែងមានអំណាចលើគាត់ទៀតហើយ ប៉ុន្តែព្រះមានវិញ។
ប៉ូលបានលើកចំណុចស្រដៀងនឹងនេះក្នុងសំបុត្ររបស់គាត់ទៅបងប្អូននៅក្រុងរ៉ូម។ គាត់សរសេរថា៖ «បងប្អូនខ្ញុំអើយ បើគិតពីច្បាប់ អ្នករាល់គ្នាបានស្លាប់ហើយ តាមរយៈរូបកាយរបស់គ្រិស្ត... យើងរួចផុតពីច្បាប់ ពីព្រោះយើងប្រៀបដូចជាស្លាប់ចំពោះអ្វីដែលធ្លាប់ចាប់យើងជាប់ពីមុន»។ (រ៉ូម ៧:៤, ៦) ខគម្ពីរនេះនិងនៅកាឡាទី ២:១៩ បង្ហាញថាប៉ូលមិនបាននិយាយអំពីការស្លាប់ក្នុងនាមជាអ្នកដែលបានត្រូវគេកាត់ទោស ដោយសារការខុសឆ្គងនៅក្រោមច្បាប់ទេ តែគាត់កំពុងនិយាយអំពីការរំដោះឲ្យមានសេរីភាព។ ច្បាប់នោះលែងមានអំណាចលើគាត់ និងទៅលើគ្រិស្តសាសនិកឯទៀតដូចគាត់ ដែលបានត្រូវរំដោះឲ្យរួច ដោយសារជំនឿទៅលើថ្លៃលោះរបស់គ្រិស្ត។
