Paulo mwahandika athi: “Omo mwatsi w’Emighambo nabiriholha, nyithoke eribyaho busana na Nyamuhanga.”—Gal. 2:19.

Ebya Paulo ahandika byabya bihambangene n’enzumwa ngulhu eyo abya iniakakanganaya ebithunga bye Galatia ebyabya omwa buthabali bwe Roma. Abandi Bakristayo ab’eyo babya ibali okw’ighendera okwa by’abakangirirya b’amabehi. Abalhume ng’abo ibakakangiriraya bathi omundu erilhamibwa atholere iniaghendera okwa Mighambo ya Musa, kutsibu-tsibu eribanibwa. Aliwe Paulo abya inianasi ngoku Nyamuhanga abya isyakiyithagha abikirirya eribanibwa. Inianakakasirye mwaghanirya nabu n’erikangania ngoku esyongangirirya esi ni sy’amabehi kandi amaghumya erikirirya ly’abalikyabu omwa kihongo ky’endongolya ya Yesu Kristo.—Gal. 2:4; 5:2.

E Biblia yikabugha ndeke-ndeke yithi omundu amaholha, akabya isyakyasiki kutse erihambwako n’ekyosi-kyosi ekimuthimbireko. (Omu. 9:5) Paulo abere akabugha athi: “Omo mwatsi w’Emighambo nabiriholha,” amanyisaya athi Emighambo ya Musa siyikimuwitheko buthoki. Aliwe, Paulo abya akakasirye ngoku busana n’erikirirya eryo awithe omo kihongo ky’endongolya, abirithoka “eribyaho busana na Nyamuhanga.”

Embinduka eyo omwa mibere eyo Paulo abyamu yabya busana ‘n’omwatsi w’Emighambo.’ Yithi? Abya imwanamabirisoborera athi “omundu syali thunganana embere sya Nyamuhanga, busana n’erikolha Emighambo, nikwa busana n’erikirirya Yesu Kristo.” (Gal. 2:16) Ni kwenene, Emighambo yabya iyabiriberererya kindu kikulhu kutsibu. Paulo mwasoborera Abanya Galatia athi: “Emighambo yahirawa busana n’erikangya amalholho erihika aho mwana wiwe asyahikira. Endaghane eyo yahabawa oko mwana oyo.” (Gal. 3:19) Emighambo muyakikangania ndeke ngoku abandu abathahikene, abakolha-nabi sibanga ghendera okwa Mighambo kwa ndeke-ndeke kandi ngoku bakayithagha ekihongo ekihikene eky’erihebwayo ngendo nguma erihika kera na kera. Neryo Emighambo muyahikya abandu oko “mwana,” Kristo. Omundu erikirirya omu Yesu Kristo, Nyamuhanga iniakamughanza mwamuthunganene. (Gal. 3:24) Paulo abugha enzumwa eyo kundi erilhabira omwa Mighambo mwaligha n’erikirirya omu Yesu. Aho Paulo abya iniamaholha omo mighambo kandi mwathoka “eribyaho busana na Nyamuhanga.” Emighambo yabya isiyikimuwitheko buthoki, aliwe Nyamuhanga iyumuwithebwoko.

Paulo mwakangania enzumwa iyan’eyo omo baruha yiwe okwa Banya Roma. “Balikyethu, mwabiriholha oko Mighambo busana n’omubiri wa Kristo . . . Thwabiriboholhwa okwa Mighambo, kusangwa thwabiriholha oko myatsi eyabya yikathuboha.” (Abar. 7:4, 6) Erisako eri kuthya n’Abanya Galatia 2:19, hakakanganaya ngoku Paulo syabya akakania okw’iholha ng’omukolha-nabi ahisi sy’Emighambo. Aliwe, ahathe eribisirira abya akakania okw’ibya bwiranda okwa Mighambo. Emighambo yabya isiyikimuwitheko obuthoki n’abandi abya ng’iyo. Mubabya bwiranda busana erikirirya omwa ndongolya ya Kristo.