Paulo wanembele’mba: “Mu mizhilo mo mo nafwijile, kuba’mba ngikale na bumi kwi Lesa.”—Nga. 2:19.

Byanembele Paulo byakwatankene na kishinka kyo aambilepo ku bipwilo byajinga mu kibunji kya Ngalatiya mu Loma. Bena Kilishitu bamo baikalanga mu kino kibunji balondejilenga mafunjisho a bubela. Bano banabalume bafunjishenga kuba’mba muntu pa kuba’mba akapuluke wafwainwe kulondela Mizhilo ya Mosesa, kikatakata muzhilo wa kuya ku mukanda. Pano bino, Paulo wayukile’mba Lesa kechi wakebelenga bena Kilishitu kuya ku mukanda ne. Wisambile nabo bulongo ne kwibetabisha’mba luno lufunjisho lwajinga lwa bubela. Kabiji wakoseshe lwitabilo lwa balongo mu kitapisho kya bukuzhi kya kwa Yesu Kilishitu.—Nga. 2:4; 5:2.

Baibolo waamba’mba inge muntu wafwa, kafwako kintu nangwa kimo kyo ayuka ne, kabiji kafwako byo omvwa ne. (Sapwi. 9:5) Paulo byo aambile’mba: “Mu mizhilo mo mo nafwijile,” walumbulwilenga’mba Mizhilo ya Mosesa yalekele kwingila kwi aye. Paulo washiinwe kuba’mba na mambo a kwikala na lwitabilo mu kitapisho kya bukuzhi, waikele “na bumi kwi Lesa.”

Luno lupimpu lwaubiwe kwi Paulo na mambo a “Mizhilo.” Lwaubiwe byepi? Wafuminetu na kulumbulula’mba “mizhilo kechi yo ilengela muntu kutelwa’mba waoloka ne, bino muntu utelwa’mba waoloka na mambo a kwitabila mwi Yesu Kilishitu.” (Nga. 2:16) Nangwa byonkabyo, Mizhilo yaingijile mwingilo wanema. Paulo walumbulwijile bena Ngalatiya kuba’mba: “[Mizhilo] yanungilweko kuba’mba mizhilulwila isoloke, kufikatu ne kimye mwana ye balayile mulaye kyo akafika.” (Nga. 3:19) Kya kine, Mizhilo yakwashishe bantu bambulwa kulumbuluka kabiji bandengamambo kuyuka’mba kechi bakonsheshe kulondelatu byonse byaambile mizhilo ne, bakebewenga kitapisho kyalumbuluka. Onkao mambo, Mizhilo yakwashishe bantu kuyuka’mba Kilishitu ye “mwana.” Muntu inge waikala na lwitabilo mwi Yesu Kilishitu, utelwa’mba waoloka kwi Lesa. (Nga. 3:24) Paulo wayukile kino kishinka mambo Mizhilo yamulengejile kwikala na lwitabilo mwi Yesu. Onkao mambo, ‘mu mizhilo mo mo afwijile’ Paulo ne kwikala “na bumi kwi Lesa.” Kino kibena kumwesha kuba’mba Mizhilo yalekele kwikala na bulume pe aye, kana Lesa.

Paul waambile byambo bipashako mu nkalata yo anembejile bena Loma. Wanembele’mba: “Anweba balongo bami, mwafwile ku Mizhilo kupichila mu mubiji wa Kilishitu . . . Twakasululwa ku Mizhilo, mambo twafwile ku kyokya kitulaminenga.” (Loma 7:4, 6) Pa kino Kinembelo ne pa Ngalatiya 2:19, bimwesha’mba Paul kechi waambilenga pa kufwa nobe ndengamambo wazhatwa na Mizhilo ya Mosesa ne. Pakuba waambilenga pa kukasululwa. Onkao mambo, Mizhilo kechi yajinga na bulume pe aye nangwa bakwabo bajinga nobe aye ne. Bonse bakasulukile na mambo a kwikala na lwitabilo mu bukuzhi bwa Kilishitu.