Pɔl bin rayt se: “Lɔ dɔn mek a day we i kam pan lɔ, so dat a go de alayv to Gɔd.”—Gal. 2:19.

Wetin Pɔl bin rayt bin kɔnɛkt to di men pɔynt we i bin de tɔk to di kɔngrigeshɔn dɛn na di Roman prɔvins we na Galeshia. Sɔm Kristian dɛn we bin de de bin dɔn bigin fɔ biliv dɛn lay lay ticha dɛn. Dɛn man dɛn ya bin de tich se fɔ mek pɔsin sev, i nid fɔ obe di lɔ we Gɔd bin gi Mozis, mɔ di wan bɔt fɔ sakɔmsayz. Bɔt Pɔl bin no se Gɔd nɔ bin want di wan dɛn we biliv di Masta fɔ sakɔmsayz paopa. I bin tɔk wit dɛn ɛn pruv se dɛn tichin dɛn de nɔto tru, ɛn i bin ɛp di brɔda dɛn fɔ gɛt mɔ fet pan Jizɔs Krays in sakrifays.—Gal. 2:4; 5:2.

Di Baybul tɔk klia wan se we pɔsin day i nɔ no natin we de apin arawnd am ɛn natin nɔ de apin to am. (Ɛkli. 9:5) We Pɔl bin se: “Lɔ dɔn mek a day,” i bin min se di Lɔ we Gɔd bin gi Mozis nɔ bin de kɔntrol in layf igen. Bifo dat, Pɔl bin biliv se bikɔs ɔf di fet we i gɛt pan Jizɔs in sakrifays, i “de alayv to Gɔd.”

Na di Lɔ bin mek di tin we bin apin to Pɔl bin chenj. Wetin mek wi se so? I bin jɔs dɔn ɛksplen se “nɔto we pɔsin de du wetin lɔ se go mek Gɔd tɔk se i de du wetin rayt, bɔt na we i gɛt fet pan Jizɔs Krays.” (Gal. 2:16) Na tru se di lɔ bin du sɔntin we rili impɔtant. Pɔl bin ɛksplen to di Kristian dɛn na Galeshia se: “I kam fɔ sho di bad tin dɛn we pipul dɛn de du te di pikin we dɛn mek di prɔmis to kam.” (Gal. 3:19) Fɔ tru, di lɔ bin mek wi no klia wan se as mɔtalman dɛn we nɔ pafɛkt ɛn we de sin, wi nɔ go ebul fala di Lɔ pafɛkt wan, bɔt wi nid wan las pafɛkt sakrifays. So di lɔ bin ɛp pipul dɛn fɔ si se Jizɔs na “di pikin”. So if wi sho se wi gɛt fet pan Jizɔs Krays, Gɔd go tɔk se wi de du wetin rayt. (Gal. 3:24) Gɔd bin se Pɔl de du wetin rayt bikɔs tru di lɔ i bin put fet pan Jizɔs. So Pɔl bin dɔn “day we i kam pan lɔ” ɛn i bin “de alayv to Gɔd.” Nɔto di lɔ bin de kɔntrol in layf igen, bɔt na Gɔd.

Pɔl bin tɔk bɔt di sem tin we i bin de rayt in lɛta to di Kristian dɛn na Rom. I bin se: “Mi brɔda dɛn, Krays in bɔdi dɔn mek una day we i kam pan di Lɔ . . . Wi nɔ de ɔnda di Lɔ igen, bikɔs di tin we bin de stɔp wi nɔ de kɔntrol wi igen.” (Rom. 7:4, 6) Dis skripchɔ ɛn Galeshians 2:19 ɛp wi fɔ no se Pɔl nɔ bin de tɔk bɔt we pɔsin go day as sina ɔnda di Lɔ. Bifo dat, i bin de tɔk bɔt di fri we dɛn dɔn fri. Di lɔ nɔ bin de kɔntrol in ɛn ɔda Kristian dɛn we tan lɛk am, we bin dɔn fri bikɔs dɛn gɛt fet pan Krays in sakrifays.