Paulo sonikaka: ‘Na nzila ya nsiku munu kufuaka na yina metadila nsiku, samu munu kuma na luzingu samu na Nzambi.’—Bag. 2:19.

Mambu Paulo sonikaka vuandaka na nguizani na diambu ya mfunu yina yandi vuandaka sala na bimvuka ya Galatia na Roma. Baklisto yankaka ya buala yango kumaka kulanda banlongisi ya luvunu. Banlongisi yango vuandaka longa ti samu na kubaka luvulusu, muntu fueti zitisa Nsiku ya Mose, mingi mingi kuzengama disiutu. Kasi Paulo zabaka yau ti Nzambi vuandaka lomba diaka ve Baklisto zengama masiutu. Yandi kanisaka kintuadi na bau na mutindu ya kundimisa, mpe yandi monisaka ti malongi yango vuandaka ya luvunu, mpe yandi kindisaka kiminu ya bampangi na nzila ya nkudulu ya kanyilu ya Yesu Klisto.—Bag. 2:4; 5:2.

Biblia metuba puelele ti kana muntu mekufua, yandi kezabaka ata kima mosi ve to yandi kebambukilaka diaka ata na kima mosi ve yina kele penepene na yandi. (Lon. 9:5) Ntangu Paulo tubaka: ‘Munu kufuaka na yina metadila nsiku,’ yandi zolaka monisa ti Nsiku ya Mose vuandaka diaka ve na kilendo samu na yandi. Kasi Paulo vuandaka na kivuvu ti na nzila ya kiminu na yandi samu na nkudulu, yandi ‘kumaka na luzingu samu na Nzambi.’

Luzingu ya Paulo sobaka ‘samu na nsiku.’ Na yinki mutindu? Yandi sasilaka ti ‘muntu ketangamaka muntu ya lunungu, na nzila ya bisalu ya nsiku ve, kasi kaka na nzila ya kuvuanda na kiminu na Yesu Klisto.’ (Bag. 2:16) Nsiku kokisaka diambu mosi ya mfunu mingi. Paulo sasilaka na Bagalatia ti: ‘Yabuelamaka samu na kumonisa mambu ya yimbi puelele, tii ntangu nkuna yina bapesaka yandi nsilulu kekuiza.’ (Bag. 3:19) Ya kedika, nsiku monisaka puelele ti bantu ya kukondua kukoka mpe ya masumu lenda tanina ve nsiku na mutindu ya kukoka mpe bavuandaka na nsatu ya nkayilu ya nsuka mpe ya kukoka. Na yau, nsiku nataka bantu tii na ‘nkuna’ yina kele Klisto. Na kumonisaka kiminu na Yesu Klisto, muntu lenda tangama muntu ya lunungu na meso ya Nzambi. (Bag. 3:24) Paulo ndimaka diambu yango, samu na nzila ya nsiku, yandi ndimaka mpe yandi kumaka na kiminu na Yesu. Na yau, Paulo ‘kufuaka na yina metadila nsiku’ mpe yandi ‘kumaka na luzingu samu na Nzambi.’ Nsiku vuandaka diaka ve na kilendo na zulu na yandi, kasi Nzambi nde vuandaka na yau.

Paulo monisaka dibanza ya mutindu yina na mukanda yina yandi sonikinaka Baroma. ‘Bampangi na munu, beno diaka beno kumaka bantu ya kufua na nsiku na nzila ya nzutu ya Klisto . . . Ntangu yayi bamekatula beto na nsiku, samu beto kufuaka na kutadila kima yina vuandaka kukanga beto.’ (Bar. 7:4, 6) Verse yayi mpe Bagalatia 2:19, kena kumonisa ti Paulo vuandaka tubila ve kufua lokola muntu ya masumu yina nsiku mekangaka. Kasi yandi vuandaka tubila nde diambu metadila kukatuka na kinanga. Nsiku vuandaka diaka ve na kilendo na zulu na yandi ata mpe na zulu ya bantu yankaka. Bakatukaka na kinanga na nzila ya kumonisa kiminu na nkudulu ya Klisto.