Paulusi naañozi kuli: “Ka mulao nenishwile kwa neku la mulao, kuli nikone kupilela Mulimu.”—Magal. 2:19.

Taba yanaañozi Paulusi neiswalisana ni taba yanaabata kukoñomeka kwa puteho ya Galatia yenefumaneha mwa provinsi ya Roma. Bakreste babañwi bane bapila kwa sibaka seo nebanze bakukuezwa ki batu bane baluta lituto za buhata. Batu bao nebaluta tuto ya kuli mutu naatokwa kumamela litaelo za mwa Mulao wa Mushe, sihulu zeama kuya kwa mupato, kuli apiliswe. Kono Paulusi naaziba kuli Mulimu naasatokwi kuli Bakreste baye kwa mupato. Naatalusize taba yeo ka nzila yekolwisa ni kubonisa hande kuli lituto zeo neli za buhata, mi atusa balumeli babañwi kuba ni tumelo yetiile mwa sitabelo sa tiululo sa Jesu Kreste.—Magal. 2:4; 5:2.

Bibele italusa hande kuli mutu haashwa, hakuna saziba mi haana kabelo kwa lika zeezwa mwa lifasi. (Muek. 9:5) Paulusi hanaabulezi kuli “nenishwile kwa neku la mulao,” naatalusa kuli naasatamiwi ki Mulao wa Mushe. Kono naaziba kuli bakeñisa kubonisa tumelo mwa sitabelo sa tiululo, naakalile “kupilela Mulimu.”

Muinelo wanaakalile kuba ku ona Paulusi wo neutile “ka mulao.” Ka mukwa ufi? Pili asika bulela kale manzwi a mwa timana yeo, naabulezi kuli “mutu ubeiwa kuba yalukile, isiñi ka misebezi ya mulao, kono ka kubonisa feela tumelo ku Jesu Kreste.” (Magal. 2:16) Ki niti kuli Mulao neupetile musebezi wa butokwa. Paulusi naataluselize Bakreste ba mwa puteho ya Galatia kuli: “Neuekelizwe kuli lifoso libonahale, kufitela kutaha mwana yanaafezwi sepiso yeo.” (Magal. 3:19) Kaniti luli, Mulao neubonisize hande kuli batu babasika petahala nebasa koni kumamela Mulao ka kutala mi nebatokwa sitabelo sa mutu yapetahalile. Kacwalo, Mulao neulibisize batu ku “mwana,” yena Kreste. Mutu naakona kubeiwa yalukile ki Mulimu haiba abonisa tumelo ku Jesu Kreste. (Magal. 3:24) Paulusi naabile mwa muinelo wo bakeñisa kuli ka tuso ya Mulao, naalumezi ku Jesu ni kubonisa tumelo ku yena. Kabakaleo, Paulusi ‘naashwile kwa neku la mulao’ ni kukala “kupilela Mulimu.” Mulao neutuhezi kuba ni maata fahalimwaa hae, kono Mulimu ki yena yanaa muzamaisa.

Paulusi naatalusize taba yeswana mwa liñolo lanaañolezi Bakreste ba kwa Roma. Naaize: “Mizwale baka, ni mina nemushwile kwa neku la Mulao ka mubili wa Kreste . . . Lulukuluzwi kwa Mulao, kabakala kuli lushwile ku sene silutamile.” (Maro. 7:4, 6) Mwa liñolo leo ni kwa liñolo la Magalata 2:19, Paulusi naasatalusi za kushwa kabakala kueza sibi sa kutula Mulao. Kono naabulezi ka kunonga ka za kulukululwa kwahae. Mulao neusina maata fahalimwaa hae kamba batu babaswana sina yena. Nebalukuluzwi kabakala kuba ni tumelo mwa sitabelo sa tiululo sa Kreste.