Paulu asonekele ngwenyi: “Ami ngwafwile kujishimbi kuhichila mujishimbi, mangana ngukahase kupwa wamutonyi kuli Kalunga.”—Ngale. 2:19.

Vaka-Kulishitu vamwe vamuchikungulwilo chamuNgalesha muLoma, vavahungumwishile kuli vaka-kunangula vamakuli. Vaka-kunangula kana vanangwilenga ngwavo, hakusaka vatu vakavalwile vatelelele kukavangiza Jishimbi jize Kalunga ahanyine Mose, chikumanyi luze lwahanjikile hakujihana. Oloze Paulu atachikijile ngwenyi, Kalunga kasakile ngwenyi vaka-kumulemesa kuvanga vavajihaneko. Akunywile vatu vatachikize ngwavo kunangula kana chamakuli. Kaha nawa ajikijishile vandumbwenyi vafwelele mundando yakusokola yaYesu Kulishitu.—Ngale. 2:4; 5:2.

Shikaho, Paulu asonekele mazu atwama hali Wavaka-Ngalesha 2:19, mangana ashindakanye chishina chakuvuluka nge, vatu kavatelele kukavangiza Jishimbi jize Kalunga ahanyine Moseko. Mbimbiliya ngwayo, mutu nge nafu katachikiza chuma numba chimweko. (Kwambu. 9:5) Omu Paulu ambile ngwenyi ‘ngwafwile kuhichila mujishimbi,’ apwile nakulumbununa ngwenyi Jishimbi jize Kalunga ahanyine Mose kajapwile cheka nangolo hali ikiyeko. Oloze atachikijile ngwenyi kufwelela mundando yakusokola chikiko chamulingishile apwanga “wamutonyi kuli Kalunga.”

Jishimbi jikiko jalumwine kuyoya chaPaulu. Mujila muka? Alumbunwine ngwenyi: “Mutu kaveshi kumuvulukila kwoloka hamilimo yamujishimbiko, shina hakufwelela Yesu Kulishitu.” (Ngale. 2:16) Chipwe ngocho, Jishimbi jazachile mulimo waunene. Paulu alwezele vaka-Ngalesha ngwenyi: “Vajihakileko mangana kuzombwojoka jishimbi chisoloke hatoma palanga nomu mwakeza muka-tanga ukwechi lushiko vashikile.” (Ngale. 3:19) Jishimbi jasolwele hatoma nge, vatu vakuhona kukupuka kaveshi kuhasa kukavangiza Jishimbi munona munonako. Ngocho, vasakiwile mutu wakukupuka avasokole. Shikaho, Jishimbi jakafwile vatu vatachikize ngwavo Kulishitu ikiye apwile “muka-tanga.” Vatu navavavulukila kwoloka mwomwo yakufwelela Yesu Kulishitu. (Ngale. 3:24) Paulu vamuvulukilile kwoloka mwomwo Jishimbi jikiko jamukafwile etavile Yesu nakumufwelela. Paulu ‘afwile kuhichila mujishimbi,’ kaha ejile nakupwa “wamutonyi kuli Kalunga.” Echi chalumbununa nge Kalunga ikiye apwile nangolo hali Paulu keshi Jishimbiko.

Paulu ahanjikile mazu kana namumukanda uze asonekelele vandumbwenyi muLoma. Asonekele ngwenyi: “Enu vandumbwami, nayenu nawa vamilingishile kupwa muvafu kuJishimbi kuhichila mumujimba waKulishitu . . . Jino tunakasunuka lyehi kuJishimbi, mwomwo tunafu lyehi kuvyuma vize vyatuhoneselenga.” (Loma 7:4, 6) Awa mazu nawaze atwama hali Wavaka-Ngalesha 2:19, kawasolola nge Paulu apwile nakuhanjika vyakufwa chenyi mwomwo yakuzombwojoka jishimbiko. Oloze apwile nakuhanjika vyakusokoka kuJishimbi. Jishimbi kajapwile cheka nangolo hali ikiye navakwavo vaka-Kulishituko. Vavasokwele mwomwo yakufwelela mundando yakusokola yaYesu Kulishitu.