Pawulu wasonekeli nindi: “Nafwili muloña wakwovwahila nshimbi kulonda niikali wamumi kudi Nzambi.”—Ñal. 2:19.

Mazu ahosheliyi Pawulu esekeni nachikuma chahosheleñayi muchipompelu munkambi yaRoma muÑalija. AkwaKristu amakwawu ayiluwañesheli kudi antañishi akutwamba. Awa amayala ahosheleña nawu hakwila muntu yakapuluki watela kwovwahila Nshimbi jaMosi, jahosheleña hakwalama. Ilaña welukili nindi Nzambi hetejeleña cheñi akwaKristu kwalamaku. Wahanjekeli nawu nakuyishinjila nakumwekesha nawu iyi ntañishilu yadiña yakutwamba nawa wakolesheli amanakwetu chakwila chikuhwelelu chawu mumulambu wefutu danyiloña waYesu Kristu chakoleli.—Ñal. 2:4; 5:2.

Bayibolu yahosha hatooka nawu muntu neyi nafwi helukaña chuma chidi chejimaku. (Mukwa. 9:5) Chahosheliyi nindi: “Nafwili muloña wakwovwahila nshimbi” watalishili mukwila nindi Nshimbi jaMosi hijadiña cheñi nawuswa hadi yenaku. Ilaña Pawulu welukili nindi neyi yakuhwelela mwifutu danyiloña, dikwila nawu ‘nekali wamumi kudi Nzambi.’

‘Nshimbi’ yaletesheli Pawulu kuhimpa chihandilu chindi. Munjilanyi? Walumbulwili nindi: “Muntu hiyamutenaña nawu waloña muloña wanyidimu yanshimbiku, chiña hohu neyi yakuhwelela mudi Yesu Kristu.” (Ñal. 2:16) Dimu, Nshimbi niyena yazatili mudimu walema. Pawulu wayilumbulwilili aÑalija nindi: “Ayibombeleliku kulonda nshidi yimwekani, sampu mwana nashiki dehi, owu akaniniwu muchikaninu.” (Ñal. 3:19) Eña, Nshimbi yashimwini hatooka nawu muntu wabula kuwanina kwila yahemba Nshimbi chiwahi nehi, dichi akeñekeleña mulambu wawanina. Dichi yayilombweli antu kudi “mwana,” Kristu. Neyi muntu yakuhwelela mudi Yesu Kristu akumutena kuloña kudi Nzambi. (Ñal. 3:24) Pawulu wahosheli chumichi muloña kuhitila muNshimbi wetejeli nikukuhwelela mudi Yesu Kristu. Dichi Pawulu ‘wafwili muloña wakwovwahila nshimbi’ nawa wekalili “wamumi kudi Nzambi.” Dichi Nshimbi hiyekalili nañovu hadi yenaku, chiña Nzambi.

Pawulu wahosheli mazu wowamu mumukanda wayisonekeleliyi aRoma. Nindi: “Enu anakwami, ninenu mwadiña akasika kuNshimbi. Ilaña kuhitila mumulambu waKristu . . . Ichi anatukasununi dehi kuNshimbi, muloña tunafwi dehi kuyuma yatukañesheleña.” (Rom. 7:4, 6) Iyi Nsona niyaAÑalija 2:19, yamwekesha nawu Pawulu wahosheleña hakufwa neyi mukwanshidi muloña wanshidiku. Ilaña, wahosheleña hakwikala wasubuka. Nshimbi hiyadiña cheñi nañovu hadi yena niantu amakwawuku. Ayisubwili kunshidi muloña wakukuhwelela mwifutu danyiloña daKristu.