Paulo nondiko kama: “Kokalo kuom chik, ne atho kuom chik mondo abed mangima kuom Nyasaye.”​—Gal. 2:19.

Paulo nondiko wechegi ka nojiwogo wach moro maduong’ ne kanyakla ma Galatia ma ne nie alwora mar Rumi. Jopuonj mag miriambo ne wuondo Jokristo moko ma ne ni kuno. Jopuonjgo ne puonjo ni mondo ng’ato oyud warruok, ne nyaka oluw Chike Musa, ahinya-ahinya chik mar tero ji nyangu. Kata kamano, Paulo nong’eyo ni koro chik mar tero ji nyangu ne ok otueyo jotich Nyasaye. Notemo chopo chuny Jokristogo kokonyogi neno ni puonj ma kamago gin puonj mag miriambo kendo tego yiegi kuom misango mar Yesu Kristo.​—Gal. 2:4; 5:2.

Muma wacho ni ka ng’ato osetho to ok ong’eyo gimoro amora ma timore. (Ekl. 9:5) Ka ne Paulo owacho ni: “Kokalo kuom chik, ne atho,” gima ne otemo wacho en ni Chike Musa koro ne ok otueye kata matin. Kar mano, ne en gadier ni yie ma noseketo kuom misango mar Yesu nomiyo koro ‘obedo mangima kuom Nyasaye.’

Paulo notimo lokruok ma kamano “kokalo kuom chik.” E yo mane? Noyudo Paulo oa lero ni “ng’ato ikwano ni en ng’at makare, ok kokalo kuom luwo chik, to kokalo kuom yie ma en-go kuom Yesu Kristo.” (Gal. 2:16) Adiera en ni Chike Musa nokonyo kama duong’. Paulo nolero ne Jo-Galatia kama e wi chikno: “Ne omede mondo richo onenre ayanga nyaka bang’ ka kodhi ma ne osingno osechopo.” (Gal. 3:19) Ee, Chike Musa nonyiso ayanga ni dhano ma joricho ne ok nyal luwo chike e yo makare chuth, kendo ne dwarore ni giyud misango ma ok orem. Omiyo, Chik ne tayo ji koterogi ir “kodhi” ma nosingi, ma en Kristo. Ka ng’ato oketo yie kuom Yesu Kristo, to Nyasaye nyalo kwane kaka ng’at makare. (Gal. 3:24) Paulo ne ni gadier ni Nyasaye ne kwane kaka ng’at makare nikech Chik nokonye keto yie kuom Yesu. Mano e momiyo Paulo nowachi ni “notho kuom chik” kendo “bedo mangima kuom Nyasaye.” Chik koro ne ok otueye kata matin nikech koro Nyasaye e ma ne taye.

Paulo nowacho weche ma chalo kamago bende e barua ma nondiko ne Jo-Rumi. Nondiko kama: “Owetena, kokalo kuom ringre Kristo, un bende ne utho kuom Chik, . . . To koro osegonywa kuom Chik, nikech wasetho kuom wach ma ne otueyowano.” (Rumi 7:4, 6) Ndikono kod Jo-Galatia 2:19 konyowa ng’eyo ni Paulo ne ok wuo e wi tho kaka jaricho e bwo Chik. Kar mano, nowacho ni koro nosekete thuolo kendo koro Chik ne ok otueye en kaachiel gi ji duto ma noketo yie kuom misango mar Kristo.