Paula chuan: “Pathian lam kawnga ka lo nun theih nân, kei zawng dân avângin dân lam kawngah ka thi tawh si a,” tiin a ziak a ni.—Gal. 2:19.

Heta Paula thuziak hian, Rom awpna hnuaia awm Galatia rama kohhrante hnêna a thusawi nên inzawmna a nei a. Chuta Kristian ṭhenkhat chu zirtîrtu dik lote thununin an awm a. Chûng mite chuan chhandam ni tûr chuan Mosia Dânin a phûtte, a bîk takin, serhtan chungchânga thupêk chu an zawm a ngai tih an zirtîr a ni. Mahse, Paula chuan ringtute chu Pathianin serh tan tûrin a phût tawh lo tih a hria a. Ani chuan ṭha taka chhûtpuiin, chu zirtîrna chu a dik lo tih a hriat chiantîr a, Isua Krista tlanna inthawinaa unaute rinna chu a tichak a ni.—Gal. 2:4; 5:2.

Bible chuan mi a thih tawh chuan eng mah a hre tawh lo va, a chheh vêla thil eng mahin a chungah nghawng a nei tawh lo tih chiang takin a sawi a. (Thur. 9:5) Paula’n: “Dân lam kawngah ka thi,” tia a sawi khân, Mosia Dânin a chungah thu a nei tawh lo a tihna a ni a. Tlanna inthawina a rin avângin, ‘Pathian lam kawngah’ a lo nung ta zâwk a ni.

Paula chunga chu inthlâk danglamna chu ‘dân avânga’ lo awm a ni a. Chu chu engtin nge a nih? Ani chuan, “Dân thiltihte avângin mi thiam changin a awm lo va, Isua Krista rin avâng chauhvin thiam changin a awm zâwk,” tiin a hrilhfiah zo chauh va. (Gal. 2:16) Dân chuan thil pawimawh tak a hlen chhuak ngei mai a. Paula chuan Galatia mite hnênah dân chu “bawhchhiatna hi sual a nih tilang fiah tûra thutiam belhchhahna, . . . thutiamin chi thlah a tih lo kal hmaa hman tûr” a nih thu a hrilhfiah a. (Gal. 3:19) Ni e, Dân chuan ṭha famkim lo sual fa mihringte hian Dân chu ṭha famkimin an zawh thei lo va, inthawina ṭha famkim an mamawh tih chiang takin a târ lang a ni. Chuvângin, Dân chuan mite chu “chi thlah,” Krista lamah a hruai a. Isua Kristaa rinna neitu chu Pathian hmaah mi fel a ni thei a ni. (Gal. 3:24) Paula chu Dân avânga Isua pawm a, a rin avângin mi fela ruat a ni a. Ani chu ‘Dân lam kawngah a thi’ a, ‘Pathian lam kawngah’ erawh a nung thung a ni. Chuvângin, Dân chuan a chungah thu a nei tawh lo va, Pathianin a nei tawh zâwk a ni.

Paula’n Rom mite hnêna a lehkhathawnah chutiang thu chu a târ lang a ni: “Ka unaute u, . . . Krista taksa avângin Dân kawngah tihthihin in lo awm ta a. Tûnah erawh chuan min chelhtu lakah thi tawhin, Dân ata thlahin kan awm ta,” tiin. (Rom 7:4, 6) He Bible châng leh Galatia 2:19-na hian Paula sawi chu Dân avânga thiam loh chantîra awm mi sual chungchâng a ni lo tih a târ lang a. Chu aiin, zalên a nihna chungchâng a sawina zâwk a ni a. Dân chuan amah leh amah ang mi dangte chungah thu a nei tawh lo. Krista tlanna an rin avângin, anni chu chhuah zalênin an awm tawh zâwk a ni.