Je Pablo i kitso: “Jetijnakʼen xi tʼatsʼe kjoatéxoma, jméni nga koatejnakonsínia xi tʼatsʼe Niná” (Gál. 2:19).

Kʼiaa kʼoakitso én jebi je Pablo nga títsoyale je chjotale Cristo xi Galacia tsʼe, ʼnde xi naxinandá Roma nchja̱ni. Tjínkʼa je chjotale Cristo xi ya tsʼe xi kui kitjenngi jmeni xi kitsoya je chjota xi to énndiso kitsoya, xi kʼoakitso nga tokʼia kuitjontjai chjota tsakui Kjoatéxomale Moisés koaitjenngi, jolani tʼatsʼe kjoacircuncisión. Tonga je Pablo be nga tsín tikui síjéni Niná nga kjoacircuncisión koaitjenngi je choʼndale. Tsakakóya je Pablo nga tsín kʼoatjín jmeni xi kitso chjota jebi kʼoa tsakasenkao je ndsʼe̱ nga ngisa nʼio kisatio kjoamakjainle tʼatsʼe nga tsakʼéchjíntjainá je Jesús (Gál. 2:4; 5:2).

Je Biblia kʼoatso nga tsín tijme xi beni kʼianga jebiya jngo chjota (Ecl. 9:5). Kʼianga “jetijnakʼen xi tʼatsʼe kjoatéxoma” kitso Pablo, kui xi kitsonile nga tsín tikui Kjoatéxomale Moisés kitjenngini. Kʼoa nga koankjainle nga tsakʼéchjíntjainá je Jesús, joxi tsakʼejnakon “xi tʼatsʼe Niná”.

Jósʼin tsoyanile jebi. Je Pablo i kitso: “ʼYanía nga chjotasonʼnde likui fetʼa jéele nga̱ kʼoasʼín jo tso kjoatéxoma, tonga kui nga makjainle tʼatsʼe Jesucristo” (Gál. 2:16). Nʼio chjíle nga kitjoson je kjoatéxoma. Je Pablo i kitsole je chjotale Cristo xi Galacia tsʼe: “Totʼatsʼe kjoatsʼantjaikjoa kisʼejna, saʼnda nga jaʼai je ntje̱ xi Niná kitsjoale tsʼoa” (Gál. 3:19). Je Kjoatéxomale Moisés tsakʼéjnatsen nga tsín kuitjoson tsjetsjená jotjínni kjoatéxoma nga̱ chjotajée maa, kʼoa machjénná nga jngo chjotatsje kʼoechjíntjainá. Kui je kjoatéxoma tsakinyakao je chjota nga koanjinle nga je Jesús je ntje̱ xi kinokjoani. ʼYani xi koa̱nkjainle tʼatsʼe Jesús, chjotakixi sʼin skoe̱kon Niná (Gál. 3:24). Je Pablo chjotakixi sʼin tsaʼyatokon nga̱ tʼatsʼe kjoatéxoma nga koankjainnile xi tʼatsʼe Jesús. Kuinga kʼoakitsoni nga kʼien “xi tʼatsʼe kjoatéxoma” kʼoa tsakʼejnakon “xi tʼatsʼe Niná”. Alikui tikui Kjoatéxomale Moisés kitjenngini, tosaa je Niná kisitjosonle.

Kʼoati kitso je Pablo kʼianga kiskile je chjotale Cristo xi Roma tsʼe. I kitso: “Kʼoatisʼin nga jonbi, ndsʼe, joni tsa xi tiyokʼaon tʼatsʼe kjoatéxomabe xi totʼatsʼe yaole Cristo [...]. Tonga ndʼaibi jejitjondaílee kjoatéxoma, nga joni tsa jetiyokʼenlee jñale xi tsakiyonʼiolee” (Rom. 7:4, 6). Je texto jebi kao jotso Gálatas 2:19, je Pablo ali tsakuijin xi kitsonile nga jo chjotajée sʼin kuiyá nga tsín kisitjoson kjoatéxoma. Kui xi kitsonile nga tsín tikui koaitjenngini. Alikui tikui Kjoatéxomale Moisés tsakatéxomanile Pablo kao xi ngikʼa chjotale Cristo. Ndái sʼin tsakatio xi totʼatsʼe nga koankjainle nga tsakʼéchjíntjainá je Jesús.