Pablo tkujäˈäyë: “Mët ko kyajts ëj ja anaˈamën nˈokpaduunë, dëˈën tpääty extëmts ëj të nˈoˈknë, dëˈënëts ëj njikyˈaty extëmë Diosë myëduumbë” (Gal. 2:19).

Diˈibë Pablo kyujäˈäyë, yëˈë nety tuk pëky kyäjpxtëˈkxypy diˈib tsojkëp tnijawëdët ja Dios mëduumbëty diˈib Galacia. Nääk, të nety yajtukninaxtë ja tukniˈˈijxënë diˈib kyaj tyëyˈäjtënëty, pes duˈunë nety të yajtukniˈˈixëdë ko parë tpäättëdë nitsokën, tsojkëp tmëmëdowdët tëgokyë ja Ley diˈibë Moisés yajmooy, extëm ko yajtsuktë mä ja yetyëjkˈäjtën. Perë Pablo nyijäˈäwëbë nety yajxon ko Dios kyaj tˈokniˈanaˈamënë parë yajtsuktët. Ko duˈunë Pablo jyënany, ta dyajnigëxëˈky ko kyaj nety tyëyˈäjtënëty extëm ja wintsëndëjk tyukniˈˈixëdët. Duˈun tpudëjkëdë ja myëguˈuktëjk parë dyajkëktëkëdët ja myëbëjkën ko Jesus ojts xykyuˈoˈkëm (Gal. 2:4; 5:2).

Biiblyë yajxon tnigajpxy ko tuˈugë jäˈäy yˈooky kyaj ti tnekyjyawë ets kyaj ti tnekyˈixy tnekytyuny tijaty tuun jäjtëp (Ecl. 9:5). Ko Pablo jyënany: “Kyajts ëj ja anaˈamën nˈokpaduunë, dëˈën tpääty extëmts ëj të nˈoˈknë”, yëˈë myaytyäˈägan ko ja Ley diˈibë Moisés yajmooy kyaj nety tˈokmëdäjnë ja mëkˈäjtënë mä yëˈë. Pablo ijtpë nety seguurë ko mët yëˈëgyëjxm ko Jesus ojts xyjyuuybyëtsëˈëmëm, mbäädë nety jyukyˈaty “extëmë Diosë myëduumbë”.

Ko duˈunë Pablo tjaygyujkë, ta net jyënany ko “kyaj pën oy wyeˈemy mët ja Dios mët ko tpaduny ja Moisésë yˈanaˈamën, yëˈëyë diˈibë myëbejkypy ja Kristë” (Gal. 2:16). Tyäˈädë Ley, të nety tuk tiempë pyudëkëdë ja Dios mëduumbëty, per të nety ja nyidiempë nyäjxnë. Pablo duˈun tˈanmääy ja Dios mëduumbëty diˈib Galacia: “Dios yäjk es dyaˈixyëty diˈibë dëˈën ja pojpë. Tadë anaˈamën yëˈë jatunan jeˈeyë axtë ko myinët ja Abrään tyëëmp yˈääts diˈibë yajwandak” (Gal. 3:19). Ja Ley yëˈë diˈib yajxon yajnigëxëˈk ko ja naxwinyëdë jäˈäy kyaj nety mbäät yajxon ttimmëdoowdë ja Diosë yˈanaˈamën, mët ko pyokyjyaˈayˈattë ets ko tsojkëbë nety pën jyuuybyëtsëmëdët diˈib wäˈätsjäˈäy. Nan pudëjkëdë jäˈäy parë tˈijxtë ko Jesus yëˈë nety ja tëëm ääts. Ets ko mbäät tuˈugë jäˈäy wyeˈemy wäˈäts Dios windum pën myëbëjkypyë Jesus (Gal. 3:24). Pablo oy ojts wyeˈemy Dios windum, mët ko tkupëjkyë Jesus ets tmëbëjky. Ko duˈun ttuuny, duˈunxyëp extëm ojts yˈoˈknë mä ja ley ets duˈunë net ojts jyukyˈäjnë “extëmë Diosë myëduumbë”. Ja Ley kyaj ojts tˈokmëdäjnë ja mëkˈäjtënë mä Pablo, yëˈëyë Dios.

Pablo nenaduˈundëkë tˈanmääy ja Dios mëduumbëty diˈib Roma: “Miitsëty mëkuˈukëty, ko të xymyëjwaˈkpättë ja Kristë jëtuˈun tpaaty ijtëm jeexyë mëët të mˈooktën ma ja ënäˈämënën [...]. E tyam, ko nˈijtëmë ijxtëm ja oˈkpën ma ja änäˈämën ëwaatsëtum të nwëˈëmënë” (Rom. 7:4, 6, TY). Mä tyäˈädë tekstë ets mä Galasyʉ 2:19, Pablo kyaj nety yëˈë tmaytyäˈägany ko të ja Ley kyëyäjkënë parë tkuˈoogëdë pyoky kyaytyey. Yëˈën yajjaygyukëyan ko të nety wyëˈëmnë awäˈätstum. Ja Ley kyaj nety tˈokmëdäjnë ja madakën mä yëˈë ets ni mä ja myëguˈuktëjk. Pes të nety yˈawäˈätspëtsëmdë mët ko Jesus kyuˈoˈkëdë.