Paulo na e gwa: “Taravatu dainai vada na mase taravatu enai, Dirava enai baina mauri helaoreana.”​—Gal. 2:19.

Paulo ese Roma ena provins Galatia ai kongrigeisin e tore henidia neganai una hereva e gwauraia. Unuseniai Kristen taudia haida na hahediba koikoi taudia ese e hakaudia kerereva. Unu tatau na e gwauva, ta na baine mauri totona namona na Mose ena Taravatu, heḡereḡere peritome karana baine badinaia. To Paulo na mai dibana, herevana ta na e peritomea o lasi to Dirava ese na dounu be abia daemu. Ia ese hereva momokanidia amo e hamomokania unu hahediba koikoi taudia edia hereva na koikoi, bona tadikaka e hagoadadia Iesu Keriso ena mauri idavalaina boubouna bae abidadama henia.​—Gal. 2:4; 5:2.

Baibul ese e hahedinaraia ḡoevaḡoeva ta e masemu neganai, ia na ḡau ta asi dibana. (Koh. 9:5) Paulo ese ina hereva “na mase taravatu enai,” e gwauraia neganai, anina na ia na vada dia Mose ena Taravatu henunai. To, Paulo na e diba mauri idavalaina boubouna baine abidadama henia neganai, ia na ‘Dirava enai baine mauri’ diba.

Mose ena “taravatu” dainai, Paulo ese ena lalohadai e haidaua. Edena dalai? Paulo na e gwa: “Tau ta taravatu ibadinana dainai maorona basie gwauraia, a Iesu Keriso ikamonai-henina mo dainai.” (Gal. 2:16) Momokani, Taravatu ese mai anina bada ḡauna ta e haḡuḡurua. Paulo ese Galatia taudia e hamaorodia eto: “Kara havara dainai e haginia, baine mia ela bona e gwauraia hamata garana baine vara.” (Gal. 3:19) Oibe, taunimanima na Taravatu amo e lalopararava idia na dia ḡoevadae, una dainai boubou ḡauna ḡoevadaena ta bae abia na namo. Taravatu ese taunimanima e durudia bae laloparara Iesu na una e “gwauraia hamata garana.” Bema ta na Iesu Keriso be abidadama heniamu neganai, Dirava ese maorona be gwauraimu. (Gal. 3:24) Paulo na Dirava ese maorona e gwaurai badina Taravatu dainai ia ese Iesu e abia dae bona e abidadama henia. Una dainai Paulo na e gwa: “Taravatu dainai vada na mase taravatu enai, Dirava enai baina mauri helaoreana.” Anina na Mose ena Taravatu basine badinaia, to Dirava baine badinaia.

Paulo ese Roma e tore henidia revarevana ai, lalohadai unu bamona danu e gwauraia. Ia na eto: “Varavaragu e, umui danu Keriso tau-anina bagunai taravatu enai vada o mase . . . Taravatu ese vada e kahuda nege, e dogoda taova ḡauna enai vada ta mase na heto.” (Roma 7:4, 6) Una siri bona Galatia 2:19 ai, Paulo na se gwa ia na Taravatu henunai kara dika tauna ta heḡereḡerena baine mase. To, ena hereva anina na ia bona Kristen taudia ma haida na Keriso ena mauri davana e abidadama henia dainai Taravatu ena iḡui amo e ruhadia.