Pol inn ekrir: “Dapre seki konsern lalwa, mo deza enn mor, enn lamor provoke par mem lalwa, pouki mo kapav viv pou Bondie.”​—Gal. 2:19.

Seki Pol ti ekrir ena enn lien avek enn kitsoz inportan ki li ti anvi fer bann frer ek ser dan lasanble Galat konpran. Sertin Kretien dan sa lasanble-la ti les zot inflianse par bann fos ansegnan. Sa bann zom-la ti pe ansegne ki zot ti bizin swiv Lalwa Moiz pou ki zot kapav sape, sirtou lalwa konsernan sirkonsizion. Me Pol ti kone ki Bondie ti nepli demann bann Kretien pou fer sirkonsizion. Alor, li ti servi enn rezonnman solid pou montre ki sa bann lansegnman-la ti fos. So rezonnman ti osi ranforsi lafwa bann frer ek ser dan sakrifis Zezi Kris.​—Gal. 2:4; 5:2.

Dapre Labib, kan enn kikenn mor, li nepli konn nanye ditou, ek nanye nepli ena lefe lor li. (Ekle. 9:5) Kan Pol ti dir: “Dapre seki konsern lalwa, mo deza enn mor,” li ti pe rod dir ki Lalwa Moiz ti nepli diriz so lavi. Pol ti sir ki, gras-a so lafwa dan sakrifis Zezi, li ti “kapav viv pou Bondie.”

Se Lalwa ki ti sanz sitiasion Pol. Kifer nou dir sa? Pol ti fek explike ki “Bondie konsider enn dimounn kouma zis, pa akoz bann aksion ki lalwa demande, me zis gras-a so lafwa an Kris Zezi.” (Gal. 2:16, NW) Li vre ki Lalwa ti akonpli enn kitsoz bien inportan. Pol ti explik bann Kretien dan Galat: “Lalwa finn azoute pou fer kone ki pese ete. Rol lalwa reste ziska larive sa desandan pouki sa promes la finn fer.” (Gal. 3:19) Lalwa ti montre dan enn fason bien kler ki bann dimounn inparfe pa ti kapav swiv Lalwa dan enn fason parfe, ek ki zot ti pou bizin enn dernie sakrifis, enn sakrifis parfe. Alor, Lalwa ti ed bann dimounn pou rekonet ki Zezi ti ‘sa desandan-la.’ Kan enn kikenn ti montre lafwa an Zezi Kris, Bondie ti kapav konsider sa dimounn-la kouma enn kikenn ki zis. (Gal. 3:24) Pol ti konpran sa parski gras-a Lalwa, li ti aksepte Zezi ek li ti ena lafwa an li. Alor, Pol ti mor “dapre seki konsern lalwa” ek ti kapav koumans “viv pou Bondie.” Lalwa ti nepli diriz Pol so lavi, me se Bondie ki ti diriz so lavi.

Pol ti koz lor mem size dan so let pou bann Romin. Li ti dir: “Mo bann frer, mo bann ser . . . par rapor ar lalwa zot finn mor, parski zot fer parti lekor Lekris. . . . Nou lib par rapor ar lalwa. Nou finn mor par rapor ar seki ti gard nou esklav.” (Rom. 7:4, 6) Dan sa bann verse-la ek dan Galat 2:19, Pol pa ti pe koz lor lamor antan ki enn peser ki kondane par Lalwa Moiz. Okontrer, li ti pe koz lor zot liberasion. Pol ek so bann konpagnon ti libere ar Lalwa Moiz. Zot ti libere gras-a zot lafwa dan sakrifis Zezi.