Paulu hantikha co: “Ukhala wiira khalayi kaaneettela Nlamulo, mi kihokhwela Nlamulo, wiira kinkhalele nkumi Nluku.”—Akalas. 2:19.

Moolumo aapostolu Paulu anaaca mwaha waataphulelaawa mayamunna o wanlokoni no Kalasiya. Makristau enci yahanca uhapusiya naatthu yeetthuciha citthu cowoothiya. Ayo atthwaayo yeetthuciha wiira ntthu ahaana eettelaka nlamulo na Moocesi, venci-venci wuulihiya wiira oopoliye ni Nluku. Masi apostolu Paulu ancuwela wiira Nluku ahohiya uruma wiira atthu anonswalela yuulihiye. Oolumaka niisariya, apostolu Paulu ahovaanyiha citthu cowoothiya ceetthucihaaya ayo atthwaayo ni ahaalipiha mayamunna wiira atepe waamini woopoliya wihu ni Yesu Kristu.—Akalas. 2:4; 5:2.

Ibiiblya inaahimya sana-saana wiira ntthu ookhwa khiivo incuwelaawe ni khiivo impankaawe; ntthu ookhwa khanviriyana ni khanttharatthara citthu cineerannyaa iriyaryawe. (Ekles. 9:5) Ukati apostolu Paulu wenryaawe: “Mi kihokhwela Nlamulo,” uyo aapheela uhimya wiira uyo ahohiya uviriyana ni uttharatthara Nlamulo na Moocesi. Khweeliini, apostolu Paulu ankupali wiira waamini woopoliya ni Yesu Kristu phaamwiiriha ‘unkhalela nkumi Nluku.’

Apostolu Paulu aarukunusale makhalelwaawe iyo inanneeyo nlattu wo Nlamulo. Uyo ahohimya eeraka co: “Hiiva ninaacuwela wiira ntthu nooniya ukhala nasariya nlattu woomwaamini Yesu Kristu, kahi nlattu wo weettela Nlamulo.” (Akalas. 2:16) Nlamulo khweeliini nahaana ifayitaaya. Apostolu Paulu ahowiirela co Akalasiya: “Nlamulo naakumiheriye wiira cooniheriye citthu coohiloka atthu caapankaaya, mpaka waahalaawe uwa ule aakhuluvelihiye wiira anhala uwa.” (Akalas. 3:19.) Iyee, nlamulo nanthoonyera wiira apinaatamu akhanle atthu omatampi ni khayaahala ukhitiri uttharihela sana-saana citthu cotheene caahimyaaya nlamulo. Apinaatamu yaanaapheela woopoliya ni ntthu oohipahuwa ni woopoliya wonkwaha mmoca mpaka. Khweeliini, nlamulo naakumiheriye wiira naakavihere apoovu mpaka waahalaawe uwa “ule aakhuluvelihiye wiira anhala uwa,” awula, Kristu. Ntthu aahala uthoonyera umwamini Yesu anhala wooniya ni Nluku ukhala ntthu osariya. (Akalas. 3:24) Paulu ahooniya ukhala ntthu eettela isariya kontha ahotthuna ukaviheriya ni Nlamulo wiira antthune ni amwaamini Yesu. Phimaana, uyo ‘ahokhwela Nlamulo’ ni ‘ahonkhalela nkumi Nluku.’ Iyo maanaaya wiira nlamulo nahohiya weettihera makhalelo a Paulu, masi Nluku phaamweettihera.

Paulu ahooluma itthu yoolattanaca niiyo nhina iwarakha yaawanikhenlyaawe arooma. Uyo enre co: “Coo, mayamunnaaka, irutthu ya Kristu ihowoopolani wiira nhiye weettela Nlamulo na Moocesi . . . Masi vano nihoopoliya wiira nihiye utthara Nlamulo, kontha khaninweherera-tho ukhottiheriya citthu.” (Aroo. 7:4, 6) Nhina nnya iveerusunnya ni nhina Akalasiya 2:19, apostolu Paulu khaacile ukhwa khampa namatampi nlattu wooheettela Nlamulo. Uhiya commo, Paulu aaca woopoliya. Nlamulo na Moocesi khananhoolela-tho uyova ni hataa makristau akhwaawe. Uyo ahoopoliya nlattu wo waamini woopoliya wawe ni Yesu Kristu.