Paul ear je im ba: “Kõn wõt kien eo, em̦õj aõ mej jãne bwe in maroñ mour ñan Anij.”​—Gal. 2:19, ftn.

Men eo me Paul ear je ear ekkejell̦o̦k ippãn juon boin eaorõk me ear kajjioñ kwal̦o̦k ñan eklejia ko me rej pãd ilo jikin eo an Rom ilo Galetia. Katak ko an ri-kaki ro reriab ear lukkuun jelõt jet iaan Kũrjin ro ijo. Em̦m̦aan rein rar katakin armej ro im ba bwe ñan an juon maroñ bõk lo̦mo̦o̦r, ej aikuj pokake men ko Kien Moses ear kakien bwe juon en kõm̦m̦ani, el̦aptata kien eo kõn m̦wijm̦wij. Bõtab Paul ear jel̦ã bwe em̦õj an jako an Anij kakien rũttõmak ro ñan aer m̦wijm̦wij. Ear kõmel̦el̦e im kwal̦o̦k ilo juon wãween me emaroñ kaalikkar im kam̦ool bwe katak ko me rein rar kwal̦o̦ki reriab, im ear kõkajoor tõmak eo an rũttõmak ro jein im jatin ilo katok in mour eo an Jesus Christ.​—Gal. 2:4; 5:2.

Elukkuun alikkar an Baibõl̦ kwal̦o̦k bwe ñe em̦õj an juon mej, ejjel̦o̦k men en̦ ejel̦ã ak ejjel̦o̦k jabdewõt men ipel̦aakin emaroñ jelõte. (Ekl. 9:5) Ke Paul ear ba: “Em̦õj aõ mej jãne [kien eo],” mel̦el̦e eo ear kajjioñ in ba ej bwe ejako an Kien eo lukwõje. Ear lukkuun tõmak im jel̦ã bwe ikijjeen an tõmak ilo katok in mour eo an Jesus, ej kiiõ “maroñ mour ñan Anij.”

Oktak in me ear wal̦o̦k ñan Paul ear wal̦o̦k “kõn wõt kien eo.” Elemen an maroñ ãindein? Ej kab m̦õjl̦o̦k an kar kõmel̦el̦e im ba bwe “naaj kõwãnõk juon armej kõn wõt an tõmak ilo Jesus Christ im jab kõn an l̦oore kien eo.” (Gal. 2:16) Ilo m̦ool, Kien eo ear katõprak juon men el̦ap an aorõk. Paul ear kõmel̦el̦e ñan ro ilo Galetia: “Kar kobaiktok ñan kaalikkar jerawiwi ko an armej, im ear jerbal m̦ae iien eo nejin ear itok, eo kar kõm̦m̦ane kallim̦ur eo ñane.” (Gal. 3:19) Aet, Kien eo ear kõm̦m̦an bwe en lukkuun alikkar bwe armej, ro me rejerawiwi ak rejjab weeppãn, rejjab maroñ kajejjet Kien eo ilo juon wãween me reban bõd ñan jidik. Bareinwõt, ear kaalikkar bwe armej rej aikuji juon menin katok me eweeppãn. Kõn men in, Kien eo ear tõll̦o̦k armej ro ñan “eo nejin,” Christ. Ilo an juon kwal̦o̦k an tõmak ilo Jesus Christ, men in enaaj kõm̦m̦an bwe Anij en maroñ kõwãnõk e. (Gal. 3:24) Kien eo ear jipañe Paul ñan kile bwe ear aikuj oktak im likũt an tõmak ilo Jesus. Kõn men in, ear ‘mej jãn kien eo’ im oktak im “mour ñan Anij.” Ear kiiõ ejjel̦o̦k an Kien eo maroñ ioon, ak Anij wõt.

Paul ear kwal̦o̦k juon l̦õmn̦ak ãinl̦o̦kwõt l̦õmn̦ak in ilo kar lõta eo an ñan ro ilo Rom. Ear ba: “Ro jeiũ im jatũ, kom̦ar mej jãn Kien Moses ikijjeen ãnbwinnin Christ . . . Kiiõ jerõl̦o̦k jãn Kien Moses kõnke em̦õj ad mej jãn Kien in me ear liãpe kõj.” (Rom 7:4, 6) Ilo eoon in kab eoon eo ilo Galetia 2:19, ej kwal̦o̦k bwe Paul ear jab kõnono kõn an juon mej kõnke ej juon rijjerawiwi kadede me em̦õj kadede an Kien eo liaakel̦o̦k. Bõtab ear kõnono kõn an juon bõk anemkwõj ak an juon rõl̦o̦k. Ear jako an kiiõ Kien eo lukwõje e kab ro jet me rej ãinwõt e. Em̦õj kanemkwõj er ikijjeen aer tõmak ilo katok in mour eo an Christ.