▪ Pawulo ohuleba: ‘Wodhela nlamulo miyo gihikwa, okwa mwaha wa nlamulo, wihina gikalewo vamentoni va Mulugu.’ — Gál. 2:19.

Ele Pawulo alebiliye enowiwanana ni muselu awogegiye ni mulogo dhoRoma oGalasiya. Makiristawu amodha a wengo yonyengenthiwa ni anamahudhiha owoota. Alobwana ala yahudhiha wihina akala muthu anofuna ovulusiwa onohowela wiwelela nlamulo na Moses, thabwathabwa nlamulo nawoga wodhela wineliwa. Mbwenye Pawulo ahinona wi Mulugu kaawaddihedha makiristawu wihina yineliwe. Alabihedhaga mubuwelo wowoneleyamo pama pawulo ovanyiha mahudhihelo ale owoota ni olibiha nroromelo naaddibila wodhela mukutho wowobola wa Yesu Kiristu. — Gál. 2:4; 5:2.

Bibliya anowoga wi muthu akwa kanubuwela ethu obe kavo ethu enavolowela mubuwelo waye. (Ecl. 9:5) Pawulo ni owoga wi ‘gihikwa, okwa mwaha wa nlamulo’ oliye afuna awoge wi nlamulo na Moses kananna mabasa wodhela oliye. Mwebaribarene Pawulo kaanganyedha wi nroromelo naaye wodhela yowobola thanvaha ebaribari ‘wihina gikalewo vamentoni va Mulugu.’

Mubuwelo ola wa Pawulo wasadduwe ‘mwaha wa nlamulo.’ Mwahaya bwaddi? Mudhidhi vang’no Pawulo ahiwoga egi: ‘Muthu kanakala owogowa mwaha wa mabasa a nlamulo, mbwenye mwaha wa nroromelo anniyena ni Yesu Kiristu.’(Gál. 2:16) Ebaribari wi nlamulo nahiwakwaneliha mabasa a thima. Ninga Pawulo awogiliye ni akudda Galata egi: ‘Nna niheliwevo wihina nonihege dhothega, ofiyedha odhuulu odha, ole opaganyiwe.’ (Gál. 3:19) Hee, nlamulo nowoga wi athu ohulogomana kiyawedhe wiwelela mwamakalelo ologomana, aliwa yohowela mukutho wologomana ni wamalabo amatene. Mwebaribarene nlamulo nna nlabihedhiwe wihina nihise nlogo ‘ofiyedha odhuulu odha,’ obe nere Kiristu. Muthu akanne nroromelo di yoyo ithaniwege owogowa vamentoni va Mulugu. (Gál. 3:24) Pawulo podi withaniwa owogowa mwaha wi wodhela nlamulo oliye omuroromela Yesu ni okanna nroromelo ni oliye, mwaha wa yeyo Pawulo, ‘okwa mwaha wa nlamulo’, wihina akalewo ‘vamentoni va Mulugu.’ Nlamulo kananna kopolo mwigumini mwa Pawulo, mbwenye Mulugu ahikanna.

Madhu mamodhave Pawulo ahasoriha mukartani mwaaye alebelaga akudda Roma egi: ‘Ni nyuwa addibila muhukwa mwaha wa nlamulo, wodhela nningo na Kiristu . . . Mbwenye peeno nihoboliwa Munlamuloni, mwaha nihikwela ele yanibarela.’ (Rom. 7:4, 6) Va yolebela ela ni yolebela ya Gálatas 2:19, Pawulo kawoga okwa mwaha wothegela nlamulo. Mbwenye oliye awoga wodhela woboliwa. Nlamulo kananna kopolo mwigumini mwaaye ni mwigumini mwaathu amodha ninga oliye. Aliwa yahimala woboliwa mwaha wa nroromelo yanniwana ni mukutho wa Yesu Kiristu.