Pawlu kiteb: “Permezz tal-​liġi mitt għal-​liġi biex nieħu l-​ħajja għal Alla.”—Gal. 2:19.

Dak li kiteb Pawlu kellu x’jaqsam maʼ dak li kien qed jgħid lill-​kongregazzjonijiet fil-​Galazja. Xi Kristjani hemmhekk kienu qed jiġu influwenzati minn għalliema foloz. Dawn l-​irġiel bdew jgħallmu li biex persuna ssalva kellha tobdi l-​Liġi Mosajka, b’mod partikulari ċ-​ċirkonċiżjoni. Imma Pawlu kien jaf li Alla ma kienx għadu qed jitlob lill-​qaddejja tiegħu biex jagħmlu ċ-​ċirkonċiżjoni. Billi rraġuna magħhom, hu wriehom li dan kien tagħlim falz u saħħaħ il-​fidi tagħhom fis-​sagrifiċċju taʼ Ġesù Kristu bħala fidwa.—Gal. 2:4; 5:2.

Il-​Bibbja turina biċ-​ċar li meta persuna tmut, ma tkunx taf x’qed jiġri madwarha. (Ekk. 9:5) Meta Pawlu qal: “Mitt għal-​liġi,” kien qed ifisser li l-​Liġi Mosajka ma kinitx għadha taffettwa l-​ħajja tiegħu. Imma Pawlu kien ċert li permezz tal-​fidi tiegħu fis-​sagrifiċċju taʼ Ġesù bħala fidwa, hu ħa “l-​ħajja għal Alla.”

Il-​Liġi għamlet il-​bidla fis-​sitwazzjoni taʼ Pawlu. Kif? Hu spjega li “bniedem ma jiġix dikjarat ġust bl-​għemejjel tal-​liġi, imma biss bil-​fidi fi Kristu Ġesù.” (Gal. 2:16) Għalhekk, il-​Liġi wettqet xi ħaġa importanti. Pawlu spjega lill-​Galatin: “Ġiet miżjuda biex tagħmel in-​nuqqasijiet jidhru, sakemm jasal in-​nisel li lilu saret il-​wegħda.” (Gal. 3:19) Iva, il-​Liġi Mosajka għamlitha ovvja li bnedmin imperfetti ma setgħux jobdu l-​Liġi b’mod perfett u li huma kellhom bżonn sagrifiċċju perfett. Għalhekk, il-​Liġi għenet lin-​nies biex jirrealizzaw li Ġesù hu “n-​nisel.” Kull min kellu l-​fidi f’Ġesù Kristu setaʼ jkun dikjarat ġust quddiem Alla. (Gal. 3:24) Pawlu wasal għal dan il-​punt minħabba li permezz tal-​Liġi Mosajka, hu aċċetta u poġġa l-​fidi f’Ġesù. Għalhekk Pawlu qal: “Mitt għal-​liġi” u ħadt “il-​ħajja għal Alla.” Il-​Liġi ma kellhiex iktar qawwa fuqu, imma Alla kellu.

Pawlu kiteb xi ħaġa simili fl-​ittra tiegħu lir-​Rumani. Hu qal: “Ħuti, intom ukoll sirtu mejtin għal-​Liġi permezz tal-​ġisem tal-​Kristu . . . Imma issa nħlisna mil-​Liġi, għax mitna għal dak li bih konna qed niġu miżmumin sod.” (Rum. 7:4, 6) Din l-​iskrittura u Galatin 2:19, juruna li Pawlu ma kienx qed jgħid li hu miet bħala midneb taħt il-​Liġi. Minflok, hu kien qed jgħid li ġie meħlus. Il-​Liġi ma kinitx għadha tgħodd għalih u għal oħrajn bħalu. Huma kienu nħelsu permezz tal-​fidi fis-​sagrifiċċju taʼ Kristu bħala fidwa.