Paulu ua sonekele ngueni: “Muomu ha mezi a lisiko nja tsile ku mezi a lisiko, linga nji yoye kuli Njambi.”—Ngal. 2:19.

Via sonekele Paulu via likuatele na cimpande ca kama c,a kele na ku leka vakua vikungulukilo via mu muhato ua Ngalata ku Loma. Vamo Vakua Kilistu va kele ku mbonge yaco, va kele na ku kava vilongesa via valongisi va makuli. Vamala vaco va kele na ku longesa ngecize linga muntu a kovoke, noho a niunge Masiko a Mosesa, cikuma-kuma lisiko lia ku lovoka. Vunoni Paulu ua tantekeyele ngecize masiko a Njambi ka a kakateyele naua vamala ku lovoka. Na vungazi vua kama, Paulu ua vianene cize cilongesa ca makuli na ku kaniamesa lutsilielo lua vamuanaye mu cikombelo ca Yesu Kilistu.—Ngal. 2:4; 5:2.

Mbimbiliya ya longesa ha toma ngecize nga muntu na-tsi ke ku tantekeya naua viuma na vimo viahi, cipue nga vi na mu kuata ni vili na ku lingika ku mukulo ueni. (Ekel. 9:5) Mu ku handeka ngueni “nja tsile ku mezi a lisiko,” Paulu ua tondele ku lombolola ngecize Masiko a Mosesa ka a kele naua na ndzili hali ikeye. Vunoni ua kele na vusunga ngecize omo lia lutsilielo lueni mu cikombelo ca Kilistu, a ka ‘yoya kuli Njambi.’

Eci ku aluluka ca viuma mu muono ua Paulu, cezile ha “mezi a lisiko.” Vati omuo? Ua handekele evi muomu tele na lombolola laza ngueni, “muntu ka sambue ku vilinga via mezi a lisiko vunoni ha ku tsiliela Yesu Kilistu.” (Ngal. 2:16) Vutuhu ngoco, mezi a lisiko a puisilemo cipanga ca seho ya kama. Paulu ua lomboluelele vakua Ngalata ngueni: “Va a pandakanene muomu vivulumuna, noho mbuto ize i keza, uze i va litavasianenene.” (Ngal. 3:19) Cili vene, Mezi a Lisiko a muesele ha toma ngecize vantu va ku hona ku tantuluka, ka va hasele ku niunga lisiko mu vutantuluke, vunoni va tondekele nkombelo ya ku tantuluka. Ngeci mukemuo, Mezi a Lisiko a nehele vantu ku mbuto ni nguetu, “Kilistu.” Muntu va hasele ku mu tumbula mukua vuviuke kuli Njambi mu ku muesa lutsilielo muli Yesu Kilistu. (Ngal. 3:24) Paulu ua hetele ha ku mu tumbula mukua vuviuke kuli Njambi, muomu ku hitila mu Mezi a Lisiko ua hetele ha ku tava Yesu na ku mu tsiliela. Ha ntsimbu yaco Paulu ‘ua tsile ku mezi a lisiko’ kaha ‘ua yoyele kuli Njambi.’ Njambi ikeye honi ua kele na ngolo hali ikeye kati naua Mezi a Lisiko.

Paulu ua handekele amo mezi a ku lifua na aa a mu mukanda ua tumine kuli vakua Loma. “Vamuanetu, enu naua mua tsile mu mezi a lisiko ha muvila ua Kilistu. . . .Vunoni vuovuno va na tu ecela ku mezi a lisiko muomu tua tsile ku cize ca tu kuatele.” (Loma 7:4, 6) Cipue ku mezi aa, ni a ku Ngalata 2:19, a muesa ngecize, Paulu ka kele na ku handeka via ku-tsa mu ku pua mukua vupi kuliya na Mezi a Lisiko, houe. Vunoni ua kele na ku handeka via ku patuka. Ni nguetu, Masiko ka a kele naua na ngolo hali ikeye na hali vakuavo vakua ku tsiliela. Muomu va patukile omo lia ku tsiliela mu nkombelo ya Kilistu.