Pablo kiijtok: “Nimochijtok keja se nimijkatsi para nochi nopa Tlanauatili ma ayok nechnauati. Nijchijki ya ni para uelis niyoltos para [Jehová]” (Gál. 2:19).

Pablo san kinekiyaya kinixtomilis se keski tlamantli tlen tlauel ipati kema kintlajkuiljuilik toikniuaj tlen Galacia. Se keskij Cristo itokilijkauaj kichiuayayaj kej katli amo kuali tlamachtiyayaj, inijuantij kineltokayayaj tlaj kichiuaj nochi tlen kiijtouayaya nopa Tlanauatili, kej nopa circuncisión, ueliskiaj momakixtisej. Pablo kimatiyaya Jehová ayokmo kiniljuiyaya itekipanojkauaj ma mochiuilikaj nopa circuncisión. Yeka, Pablo kuali kinextik nopa tlamachtili amo eliyaya melauak, uan kinpaleuik toikniuaj nojua kuali ma tlaneltokakaj ipan Cristo imikilis (Gál. 2:4; 5:2).

Biblia kiijtoua kema se maseuali miki, ayokmo tleno kimati uan ayokmo kitekipachoua yon se tlamantli (Ecl. 9:5). Kema Pablo kiijtok: “Nimochijtok keja se nimijkatsi para nochi nopa Tlanauatili”, kinejki kiijtos nopa Tlanauatili tlen Moisés kimakatoyaj ayokmo kipiayaya ipati. Ya motemachiyaya Cristo imikilis ueliskia kimakixtis.

Pablo kipatlak tlen kineltokayaya pampa moyakanki ika nopa Tlanauatili. ¿Kenijkatsa kichijki? Ya kiijtok: “Tojuantij nojkia tijneltokakej Jesucristo para toTeko Dios ma techchiua tixitlauakej iixpa pampa tijneltokatokej” (Gál. 2:16). Maske achtouia nopa Tlanauatili kena kinpaleuijtoya, Pablo kiniljuik tlaneltokanij tlen Galacia: “Nochi nopa Tlanauatili san kipixki iteki hasta tlakatiskia Cristo, yajaya tlen iteipaixui Abraham tlen toTeko kitenkajki para kiteochiuas” (Gál. 3:19). Nopa Tlanauatili kinextik maseualmej amo ueliskiaj kichiuasej nochi tlen nopaya kiijtoua pampa elij tlajtlakolejkej, yeka monekiyaya ma kinmakixti se akajya katli amo tlajtlakole. Nopa Tlanauatili kinpaleuik ma kimatikaj Jesús eliskia katli kinmakixtiskia, uan tlaj tlaneltokaskiaj ipan ya, Jehová kinitaskia xitlauakej (Gál. 3:24). Pablo uelki momakixtik pampa ika nopa Tlanauatili kiselik uan tlaneltokak ipan Jesús. Kiampa kinextik kejuak mijki “para nochi nopa Tlanauatili” uan kiampa yoltos iixpa Jehová. Yeka, nama monekiyaya kineltokas Jehová uan ayokmo nopa Tlanauatili.

Pablo nojkia kiniljuik ni, toikniuaj tlen Roma: “Nochi nopa Tlanauatili ayok kipiaj chikaualistli ika inmojuantij. Ximomakakaj cuenta para inmijkej ininixpa nopa Tlanauatili kema inmijkej ipan nopa kuamapeli [kuauitl, TNM] iuaya Cristo. [...] Pero ama pampa timijkej iuaya Cristo, yajaya techmajkajtok tlen iTlanauatil Moisés para ma tiitstosej titojtontokej uan yeka nopa Tlanauatili ayok techpixtok imako para ma tijtekipanokaj” (Rom. 7:4, 6). Ipan ni textos uan tlen kiijtoua Gálatas 2:19, Pablo amo kinejki kiijtos nelnelia mikiskiaj pampa tlajtlakolchijtoyaj. Kinejki kiijtos kema se akajya ayokmo kichiuayaya tlen kiijtouayaya nopa Tlanauatili. Nama, Pablo uan sekinok Cristo itokilijkauaj itstoyaj kejuak majkajtokej pampa pejkej tlaneltokaj ipan Jesús imikilis.