Paulo mwahandika ati: “Nikwa omo mwatsi w’Emigambo nabirihola, nitoke eribyaho busana n’oMungu.”​—Gal. 2:19.

Ebyo Paulo ahandika byabya ibinahambene n’ebinywa ebyo ahandikira esyondeko omo muyi we Galatia owabya e Roma. Abakristo balebe babya ibabiritsuka eriligha amakangirirya w’amabehi. Abalume balebe babya bakakangirirya bati omundu eribana omulamo atolere iniakwama ebisakire omo Mighambo ya Musa, kutsibu-tsibu omughambo w’eribanibwa. Aliwe Paulo abya inianasi ngoko oMungu syakisaba abandu biwe eribanibwa. Omwilengekania nabo, Paulo mwabakangania ngoko amakangiriria ayo abya w’amabehi kandi mwawatya obwikirirya bw’abaghala babo omo mbanulo ya Yesu Kristo.​—Gal. 2:4; 5:2

EBiblia yikakanganaya ndeke-ndeke ngoko omundu akabya abihola syangowa omwatsi wosi-wosi, akabya isiasi kindu kyosi-kyosi. (Omug. 9:5) Omughulu Paulo abugha ati: “Omo mwatsi w’Emigambo nabirihola” asonda erikangania ngoko syakisondolawa n’emighambo ya Musa. Paulo abya alighire ndeke ngoko erilabira obwikirirya bwiwe omo mbanulo ya Yesu, ‘abiribyaho busana n’oMungu.’

Paulo mwakola embinduka eyo busana n’omughambo. Ekyo mukyatokekana kiti? Iyuwene-wene mwabugha ati: “Omundu syalitunganana embere sy’oMungu busana n’erikola emighambo, nikwa busana n’erikirirya Yesu Kristo.” (Gal. 2:16) Omughambo mwaberererya omwatsi mulebe w’omughaso munene. Paulo mwakanirya Abanya Galatia ati: “Emigambo yahirawa busana n’erikangya amalolo erihika aho mwana wiwe asyahikira. Endagane eyo yahabawa oko mwana oyo.” (Gal. 3:19) Erilabira emighambo, mukyalangirika ndeke-ndeke ngoko abandu abatahikene, abakakola amalolo sibangatoka eriberererya ebiri omo mighambo, kandi ngoko batolere ibabana embanulo eyihikene. Neryo omughambo mwasondola abandu oko Kristo. Omundu anganabya mutunganene embere sy’oMungu amabya n’obwikirirya oko Yesu Kristo. (Gal. 3:24) Paulo mwahikira eribya atya kundi emighambo muyamuwatikya eriligha n’erikirirya Yesu. Paulo ‘mwahola omo mwatsi w’emigambo’ kandi ‘n’eribyaho busana n’oMungu.’ Omughambo syabya n’akaghala k’erimutabala, aliwe oMungu yuwabya n’akaghala ako.

Paulo mwabugha ebinywa ebiri ng’ebyo omo baruha eyahandikira Abanya Roma. Mwabugha ati: “Bali kyetu, mwabirihola oko migambo busana n’omubiri wa Kristo owahola . . . Twabiriboholwa oko migambo kusangwa twabiriboholwa oko myatsi eyabya ikatuboha.” (Rom. 7:4, 6) Omo risako eryo n’ery’ Abanya Galatia 2:19, Paulo syabya akakania okwihola ng’omukola nabi oyulyatswerawa erikwamana n’emighambo. Aliwe mwakanirya oko mwatsi w’eribya omo bwiranda. Abya isyakisondolawa n’emighambo ya Musa haghuma n’abandi ababya ngiye. Babya ibabiribya omo bwiranda erilabira obwikirirya obo babya nabo omo mbanulo ya Kristo.