UPowula watlola wathi: “Ngomthetho ngafa ngokuphathelene nomthetho, ukuze ngiphile ngakuZimu.”—Gal. 2:19.

Lokho uPowula atlola ngakho bekukhambisana nephuzu eliveleleko ebekaliveza emaKrestwini weGalathiya asifundeni seRoma. Amanye amaKrestu esifundenesi bewafakwe ngehloko eemfundisweni zamala. Bebafundisa abantu ukuthi nabazakusindiswa bekufuze balandele uMthetho kaMosi, khulukhulu bekufuze basoke. Nokho, uPowula bekazi ukuthi uZimu akasatlhogi ukuthi iinkhonzi zakhe zisokwe. Wabulala iimfundiso ezimamala ngeenzathu ezizwakalako begodu waqinisa abafowabo ukuthi baragele phambili nokukholelwa esihlengweni sakaJesu Krestu.—Gal. 2:4; 5:2.

IBhayibheli likubeka epepeneneni ukuthi lokha umuntu nakahlongakalako, akasaphili begodu akezwa litho. (Umtj. 9:5) UPowula nakathi: “Ngafa ngokuphathelene nomthetho,” bekatjho ukuthi uMthetho kaMosi bewungasasebenzi kuye. Kunalokho, uPowula bekaqiniseka ngokuthi ukukholelwa kwakhe esihlengweni, ‘kwamenza waphila ngakuZimu.’

Ukutjhuguluka ebujamweni bukaPowula beza “ngomthetho.” Njani? Bekaqeda ukuhlathulula bona “umuntu kuthiwa ulungile, ingasi ngemisebenzi yomthetho, kodwana ngokukholwa kuJesu Krestu kwaphela.” (Gal. 2:16) Kuliqiniso, umthetho wadlala indima eqakathekileko. UPowula wahlathululela beGalathiya: “Wanikelwa bona ukweqiwa komthetho kubonakale, bekube kulapho kufika khona isizukulwana okwenziwe isithembiso ngaso.” (Gal. 3:19) UMthetho wakubeka emtarini ukuthi abantu abanesono, bebangeze bakghona ukulandelela umthetho njengombana unjalo, begodu bebafuna isihlawulelo esinganasono. Yeke, uMthetho wadosela abantu kuKrestu ngokukholelwa kuJesu Krestu, uZimu bekangathi umuntu loyo ulungile. (Gal. 3:24) UPowula wafikelela esiphethweneso ngombana ngoMthetho awamukelileko wakholelwa kuJesu. Kungebangelo uPowula akghona ukuthi, “ngafa ngokuphathelene nomthetho” begodu “ukuze ngiphile ngakuZimu.” Umthetho lo bese ungasakghoni ukumlawula uPowula kodwana bekalawulwa nguZimu

UPowula wakhuluma amezwi afanako encwadinakhe ayitlolela beRoma. Wathi: “Nje-ke bafowethu, nani nabulawa malungana nomThetho ngomzimba kaKrestu . . . Kodwana nje sitjhatjhululiwe emThethweni, ngombana sifile kilokho ebekusivimbela.” (Rom. 7:4, 6) Umtlolo lo newebeGalathiya 2:19, uveza ukuthi uPowula bekangakhulumi ngokufa njengomuntu owonileko ngaphasi koMthetho. Kunalokho, bekakhuluma ngokutjhatjhululwa. UMthetho besele ungasasebenzi kuye nakwabanye abanjengaye. Besele batjhaphulukile ngebanga lokukholelwa esihlengweni sakaKrestu.