Paulo elemba kuti: “Mwa cilamulo, necifwa ku cilamulo kuti ninkhale wamoyo kwa Mulungu.”​—Agal. 2:19.

Paulo elembela mau aŵa ku mipingo ya ku Galatiya yamene yenze m’cigao ca Roma. Ndaŵa yanji? Cifukwa Akhristu aŵa enzosonkhezelewa na ŵanthu amene enzophunzisa vinthu vawenye. Ŵanthu aŵa enzophunzisa kuti Akhristu enzofunika kukonkha Cilamulo ca Mose pa nkhani yocita mdulidwe kuti akapulumuke. Koma Paulo enzoziŵa kuti lamulo yokhuza mdulidwe yenzokata lini nchito pa nthawi iyi. Tetyo, epeleka zifukwa zomvwika zoonesha kuti ciphunziso ici cenze cawenye. Ndipo elimbikisha akwasu kuti enzofunika kukhulupilila nsembe ya Yesu Khristu.​—Agal. 2:4; 5:2.

Baibo yulaŵila momvwika bwino kuti munthu akafwa, oziŵa lini ciliconse. (Mla. 9:5) Tetyo, Paulo pecilaŵila kuti: “Necifwa ku cilamulo,” enzotanthauza kuti Cilamulo ca Mose cenzokata lini nchito pa yove. M’malomwake, enzoziŵa kuti “enkhala wamoyo kwa Mulungu” cifukwa enzokhulupilila nsembe ya dipo.

“Cilamulo” niye ceyavya Paulo kuti acinje umoyo wake. Motyani? Yove elaŵila kuti “munthu oyesewa kunkhala wolungama mwa kukhulupilila Khristu Yesu osati cifukwa ca nchito za cilamulo.” (Agal. 2:16) Kulaŵila cendi, Cilamulo cecita mbali yofunika ngako. Polaŵila za kufunika kwa cilamulo, Paulo elembela mipingo ya ku Galatiya kuti: “Eciyangizhyilapo kuti macimo aonekele, mpaka wamene ali mbeu akafwike, wamene epasiwa lonjezo yamene iyi.” (Agal. 3:19) Cilamulo ceoneshelatu kuti zingankhale zovuta kuti ŵanthu aliye ungwilo akwanishe kusunga malamulo onse a m’cilamulo. Ceonesha soti kuti ŵanthu enzofunikila nsembe yangwilo. Tetyo, Cilamulo ceyavya ŵanthu kuziŵa kuti Yesu niye enze “mbeu” yolonjezewa. Kukhulupilila mwa Yesu Khristu niye kucitisha munthu kuonewa kuti ni wolungama kwa Mulungu. (Agal. 3:24) Paulo ezindikila mfundo iyi, cifukwa Cilamulo niye cemuyavya kunkhala na cikhulupililo mwa Yesu. Tetyo, Paulo “ecifwa ku cilamulo” nonkhala “wamoyo kwa Mulungu.” Cilamulo cenzeve soti mphamvu pali yove, koma Mulungu.

Paulo elaŵila mau yolingana na aya pecilembela kalata mpingo wa Aroma. Yove elaŵila kuti: “Akwasu, muŵili wa Khristu wekupangishani kunkhala akufwa ku Cilamulo. . . Tamasuliwa ku Cilamulo cifukwa tafwa ku Cilamulo camene cenzotimanga.” (Aro. 7:4, 6) Lemba iyi koma soti Agalatiya 2:19, yoonesha kuti Paulo enzolaŵila lini za kufwa cifukwa cophwanya Cilamulo. M’malomwake, yove elaŵila kuti nsembe ya Yesu Khristu niye yepangisha ŵanthu kunkhala na ufulu. Tetyo, Cilamulo cenzeve mphamvu pali yove koma soti ŵanthu ayakine. Ove emasuliwa cifukwa cokhulupilila nsembe ya Yesu Khristu