Pauli alembile ukuti: “Munjila ya ndaghilo mo ndi mfwe itolo kundaghilo, ukuti njeghe mumi kwa Kyala.”—Gal. 2:19.

Isi Pauli alembile syakolelanagha nifundo iyi ayobile ku fipanga fya ku Roma nkaya ka Bagalatia. Abakristu bamo basofanisiwe nifimanyisyo fya butungulu. Abandu bamo bamanyisyagha ukuti linga umundu ikulonda ukuti asapone ikulondiwa ukukonga indaghilo isi Kyala abapele Abaisraeli ukwendela mwa Mose, fiyofiyo ululaghilo ulwa kubutiwa. Loli Pauli asimenye ukuti Kyala akalondagha ukuti ababombi bake babutiweghe. Pauli ababulile ikifukwa ikyakupilikiwa kangi asusisye ifimanyisyo ifyabutungulu nu kubatula bakamu na balumbu ukuti baye nulwitiko mwikemo lya Yesu Kristu.—Gal. 2:4; 5:2.

Ibaibolo likuyoba mwakupilikiwa kanunu ukuti linga umundu afwile, atikumanya nasimo pamo ukupalamasiwa nikindu kilikyosa iki ali nakyo pabupipi. (Ndumbi. 9:5) Bo Pauli ikuyoba ukuti: “Ndi mfwe itolo kundaghilo,” asanusyagha ukuti indaghilo sya Mose sikali nimbombo ku myake. M’malo mwake, umwene ali nulusubilo losa ukuti panongwa yakuya nulwitiko mwikemo lya Yesu, “ikuya mumi kwa Kyala.”

Indaghilo syapangisye ukuti Pauli achenje. Bulebule? Umwene alingenie ukuti “nayumo atikuyobiwa ubugholofu mumbombo sya lulaghilo, loli mwene mu ndwitiko lwa mwa Kristu Yesu.” (Gal. 2:16) Bwanaloli ukuti, indaghilo sifwanisye ikindu kimo ikyakulondiwa fiyo. Pauli ababulile Abakristu ba ku Galatia ukuti: “Syalyongelilepo panongwa ya ngilanie; ukwisakufika papo yikwisilagha imbeyu iya ndufingo.” (Gal. 3:19) Indaghilo syanangisye pabwelu ukuti abandu abasitabugholofu aba batulanongwa bakabaghila ukufwanisya ukukonga indaghilo mbugholofu kangi bikulondiwa ikemo igholofu. Yonongwa yake indaghilo syabatulagha abandu ukumanya ukuti Yesu yo “mbeyu.” Linga umundu ali nulwitiko mwa Yesu, abaghile ukuya ngolofu kwa Kyala. (Gal. 3:24) Pauli ayimenye ifundo iyi panongwa yakuti ukwendela mu ndaghilo anangisye ukuti ali nulwitiko mwa Yesu. Apa Pauli “afwile itolo kundaghilo” kangi alinkuya “mumi kwa Kyala.” Indaghilo sikali nimbombo kumyake loli Kyala.

Pauli alingenie ifundo iyakufwana itolo mwakalata wake uwakubuka ku Bakristu ba ku Roma. Umwene atile, “Mwe bamyitu, nanumwe mufwile kundaghilo mu mumbili wa Kristu. . . Twabuliwe kundaghilo, tufwile kuli aka katupinyile.” (Rom. 7:4, 6) Ilemba ili ni lya Bagalatia 2:19, ghikunangisya ukuti Pauli akayobagha isyakufwa panongwa ya butulanongwa ubu bwali pasi pa ndaghilo. M’malo mwake, ayobagha isya kwabuliwa kubutulanongwa. Indaghilo sikabombagha imbombo ku myake na ku bangi. Abene balyabuliwe panongwa ya lwitiko ulu bali nalo mwikemo lya Kristu.