Pɔɔl bee ɛm kɔ: “Mda tɛ̄maloo lok bee u loo lok, lokwa m tɔɔ̄ dum nɛ Bari.”—Gal 2:19.

Nu Pɔɔl bee ɛm bee gbaaloo kpog-bee nu a gaa bee kɔ nɛ bɔŋanaloo Galetia a bee le barasī Rom. Pya a tɔgɛ ekwɔ tɔgɛnu ebee ɛrɛ pah nyɔɔ pio pya Nɛɛ Kraist a bee le lo kɛ̄. Pya nɛɛ ama bee tɔgɛ kɔ o ɛrɛ esere Lok Mozis lokwa o dap ɛrɛ kpɔā, eetɔɔ̄ na lo akiiloo kooa piī. Mɛ Pɔɔl bee suā kɔ Bari naa gbīna kɔ pya nɛɛ a yiga a dasī kooa. Tɛ̄maloo enyɔɔnɛ wa ɛrɛ ekɛɛrɛ, a bee tɔgɛ kɔ pya lo tɔgɛnu lu ekwɔ sa agɛrɛtɛ̄ yira pya wuga ɛrɛ bu waara zɔɔ a’agara Jizɔs.—Gal 2:4; 5:2.

Baibol para ekɔ leere kɔ sɔ̄ nɛɛ u, a naa suāna lɔgɔ nu ale bee ziī nu a ye le kpaɛ̄ enɛ ye taāŋa. (Eklis 9:5) Sɔ̄ Pɔɔl kɔ: “Mda tɛ̄maloo lok bee u,” nu aa bee kɔ na bee Lok Mozis naa bee ye ɛrɛna bah ekpo loo. Taāwo, Pɔɔl bee suā leere kɔ tɛ̄maloo yira a ɛrɛe bu waara zɔɔ a’agara, esiae kɛ̄ “tɔɔ̄ dum nɛ Bari.”

Lo “lok” bee nyaana kɛ̄tɔɔ̄ Pɔɔl. Bu mɛ sīdee? E bee baatɛ̄ kɔ “a naa lu ebiaɛ nɛɛ leere tɛ̄maloo tam lok, . . . mɛ tɛ̄maloo yira bu Jizɔs Kraist.” (Gal 2:16) Nyɔɔwo, lo Lok edora nu alu gbɛnɛ. Pɔɔl bee baatɛ̄ nɛ Pya Galetia kɔ: “Bee lu eyere loo nyɔnɛbee gbee lok, mmɛ sɔ̄ eyuu ama elu nɛ nɛɛ yii ama bee le nɛ.” (Gal 3:19) Bu kaka, lo Lok tɔgɛ kɔ pya a naa mmana naale edap sere lo Lok bu sīdee a mmana, wo doo kɔ ba a gbī waara zɔɔ a mmana lo elu kpɛdumɛ. Nyɔɔwo lo Lok ture pya nɛɛ mmɛ loo lo “eyuu,” lo a le Kraist. Bari dap buū ziī nɛɛ nua nɛɛ kaāna dogo tɛ̄maloo yira a ɛrɛ bu Jizɔs Kraist. (Gal 3:24) Pɔɔl bee yii bu kɛ̄tɔɔ̄ a le doo wo, nyɔɔbee tɛ̄maloo Lok a bee ɛrɛ yira bu Jizɔs. Sɔ̄ sɔ̄ aa kiisī, Pɔɔl “bee u loo lok” sa a bee sikɛ̄ “tɔɔ̄ dum nɛ Bari.” Lo Lok naa ɛrɛna ye bah ekpo loo, mɛ Bari ɛrɛ.

Pɔɔl bee kɔnage dua ue ama bu kpa a bee ɛm ma Pya Rom sɔ̄ a kɔ: “Bɔɔlo bee unage nɛ lok tɛ̄maloo ekpaloo Kraist, . . . I aa bee sinagekɛ̄ aŋia aa bu lok, e i bee u loo nu a bee i aa bie kɛ̄.” (Rom 7:4, 6) Kɛ̄ i buū ama le bu Pya Galetia 2:19, tɔgɛ kɔ Pɔɔl naa gaa bee kɔ nu akiiloo u luh doodoo nɛɛ pɔrɔ kɛɛ̄ Lok. Taāwo, aa bee kɔ nu akiiloo lulu puɛ. Lo Lok naa ɛrɛna ye bah ekpo loo le pya a le doodoo alɛ. Ba bee lu puɛ nyɔɔbee yira ba ɛrɛ bu waara zɔɔ a’agara Kraist.