Paul ọrhọ ya: “Nyoma urhi yi mie hwu harẹn urhi, neneyo mi sabu nyerẹn harẹn Osolobrugwẹ.”—Gal. 2:19.

Oborẹ i Paul ọ yare o serhọ rhẹ oghwẹmro ọghoghanren ọye ọ ta kpahan rẹn ukoko rọ ha okogho ọrẹ Galatia uvuẹn ẹkwotọre Rome. A riẹriẹ Ilele Kristi ezẹko nyoma iyono efian. Ehworhare enana e yono taghene nẹ ohworho ọ sabu vwo arhọ, ọnọ vi mọrọn Urhi Moses, maido urhi osamo. Ọrẹn, Paul o rheri taghene Jehova o jurhi osamo na rẹn Ilele Kristi-i. Paul nọ dabu dje yi fiotọre taghene iyono enana efian, nọ ji bọn esegburhomẹmro imizu na gbanhon kpahen izobo otan i Jesu Kristi.—Gal. 2:4; 5:2.

Baibol ọ tare taghene ogege ohworho orho hwu, o rhe emru owuorowu ghwomara-an. (Eccl. 9:5) Ọke i Paul ọ ta: “Yi mie hwu harẹn urhi,” ọ haye ta taghene ọye ọ ha obotọre Urhi Moses ghwomara-an. Paul o vwo imwẹro taghene nyoma esegburhomẹmro ro vwo kpahen izobo otan na, ọye o “nyerẹn harẹn Osolobrugwẹ.”

Ewene ọrana ọ homaphia uvuẹn erhirhiẹ Paul “nyoma urhi” na. Izede ọgo? Paul o djerie fiotọre ne, taghene “rhẹ nyoma ewian erẹ urhi ye se ohworho ọvwata-a, ọrẹn nyoma esegburhomẹmro re vwo kpahen i Jesu Kristi.” (Gal. 2:16) Omarana, urhi na ọ wian owian ọghoghanren ne. Paul nọ dabu dje yi fiotọre rẹn itu i Galatia: “E rurie neneyo a sabu dje edandan phia bọmọke ọmọ re vive kpahen na ọnọ homaphia.” (Gal. 3:19) Ee, urhi na ọ dabu dje yi fiotọre taghene ituakpọ ri rhiẹ eruedandan, ri vwa gba i sabu mọrọn urhi na izede rọ gbare-e, omarana, aye i guọlọ izobo rọ gbare. Omarana, Urhi na o suẹn ihworho bru “ọmọ” na, ro rhiẹ Kristi. Nyoma esegburhomẹmro kpahen Jesu Kristi, Jehova nọ nọ sabu se ohworho ọvwata. (Gal. 3:24) Paul ọ sabu vwẹruọ ye fọkime nyoma Urhi na, yẹ ọye o rhiabọ dede, ji vwo esegburhomẹmro kpahen Jesu. Omarana, Paul no “hwu harẹn urhi” ọrẹn no “nyerẹn harẹn Osolobrugwẹ.” Urhi na orho vwo omẹgbanhon kpahiẹ-ẹn, ọrẹn Osolobrugwẹ yo vworie.

Paul o ji ta aruẹ ẹmro enana uvuẹn ileta rọ ya vwe itu i Rome. “Imizu mẹ are i ji hwu harẹn urhi na nyoma ugboma Kristi na . . . Ọwan a ha otọre Urhi na ghwomara-an, fọkime e hwu nẹ oborẹ ọ mọrọn ọwan bi ne.” (Rom. 7:4, 6) Ekete i Baibol ọnana ọrhẹ Galatians 2:19, i djephia taghene Paul ọ vwọ tẹmro kpahen ọrẹ ọye ono hwu jerẹ oruọdandan obotọre Urhi na-a. Ukpomaran, ọye ọ tẹmro kpahen ọrẹ ọye ono vwo ugbomọphẹ. Urhi na orho vwo omẹgbanhon kpahen i Paul ọrhẹ awọrọ-ọ. Aye i vwo ugbomọphẹ ne nyoma esegburhomẹmro aye vwo kpahen izobo otan i Jesu.