Insulat nen Pablo: “Diad panamegley na ganggan et inatey ak ed ganggan pian magmaliw ak a mabilay ed Dios.”—Gal. 2:19.

Insulat itan nen Pablo pian idanet so importantin punto ya labay ton ipaimano ed saray agagi ed Galacia. Say arum ed sikara et naimpluensyaan na saray palson managbangat. Ibabaga na sarayan managbangat ya niliktar labat kuno so sakey ya too no uunoren toy Mosaikon Ganggan, lalo lay panagsegat. Balet amta nen Pablo ya agla kaukolan ya manpasegat iray Kristiano ta agla ra sakop na Mosaikon Ganggan. Diad makakombinsin paraan, impaliwawa nen Pablo ed saray agagi ya aliwa iratan ya bangat, tan pinabiskeg toy pananisia ra ed dondon bagat nen Jesu-Kristo.—Gal. 2:4; 5:2.

Malinew ya ibabaga na Biblia ya no say sakey ya too et ompatey, anggapo lan balot so amta to tan agla naapektoan na saray nagagawad kaliberliber. (Ecl. 9:5) Kanian nen insulat nen Pablo ya, “Inatey ak ed ganggan,” say labay ton ibaga et anggapo lay epekto na Mosaikon Ganggan ed bilay to. Balet imbaga to ya sikatoy “nagmaliw . . . a mabilay ed Dios” lapud pananisia to ed dondon.

Imbaga nen Pablo ya satan ya pananguman ed bilay to et agawa “panamegley na ganggan.” Akin et ontan so imbaga to? Impaliwawa to: “Say sakey a too et niyabawag a matunong, aliwan diad panamegley na saray gawa a kakaukolanen na ganggan, noagta dia labat ed panamegley na pananisia ed si Jesu-Kristo.” (Gal. 2:16) Tua, baleg so nitulong na Ganggan ed saray lingkor na Dios nensaman. Insulat nen Pablo ya inter na Dios so Ganggan “pian ompatnag iray impakasumlang, anggad isabi na ilalak a parad sikato so sipan.” (Gal. 3:19) On, lapud Ganggan et anengneng na saray totoo ya talagan makasalanan ira, agdan talaga naunor so amin ya ibabaga na Ganggan, tan kakkaukolan da so perpekton bagat pian nasakoban so kasalanan da. Intonton sirin na Ganggan iray totoo ed samay insipan na Dios ya “ilalak,” si Kristo. No say sakey et ipanengneng toy pananisia ed si Jesu-Kristo, sikatoy ipasen na Dios ya matunong. (Gal. 3:24) Akatulong so Ganggan pian natalosan tan panisiaan nen Pablo ya si Jesus so insipan ya ilalak. Lapud pananisia tod dondon bagat nen Jesus, sikatoy “inatey . . . ed ganggan” tan nagmaliw ya “mabilay ed Dios.” Diad Dios la so pampapasakopan to tan agla sakop na Ganggan.

Walay ontan met ya insulat nen Pablo ed saray agagi ed Roma. Say kuan to: “Agagik, inatey kayo met la ed Ganggan diad panamegley na laman na Kristo . . . Natan et nibulos itayo la ed Ganggan, lapud inatey itayo la ed samay mamupuger ed sikatayo.” (Roma 7:4, 6) Diad satan ya teksto tan ed Galacia 2:19, say tutukoyen nen Pablo et aliwan say ipatey ya resulta na agpangunor ed Ganggan. Imbes, imbaga to ya sikatoy inatey ed Ganggan ta bulos la ed satan. Anggapo lay kontrol na Ganggan ed sikato tan ed arum ni ya nibulos la lapud pananisia ra ed dondon nen Kristo.