A Paulus a milluches el kmo: “Ngak a ulekiu a Llach e mlad el kirel a Llach el uchul e ak mo ngar el kirel a Dios.”​—Gal. 2:19.

Aika el lulluches a Paulus a oltirakl er a tekoi el lulsaod el mora ike el ongdibel er a Galatia er a Rom. A rebebil el Kristiano er tia el beluu a mlechetakl er a osisecheklir a reklsuul sensei. Tirka ullisechakl el kmo a lsekum a chad a soal el nguu a osobel e ngkirel el oltirakl a Llach er a Moses, el ileakl a tekoi er a botk. Me nguaisei engdi a Paulus a mle medengei el kmo a Dios a mla mo diak longerechir er a rechad el mo obotk. Me ngmle blak a rengul el omeketakl el kmo aika el osisechakl a klsuul. Ngdirrek el millisiich a klaumerang er tir el kirel a olubet el tengetengel a Jesus Kristus.​—Gal. 2:4; 5:2.

A Biblia a bleketakl el kmo, a chad sel lemad e ngdiak a ngera el lodengei me a diak a klisichel a ngii di el ngerang er ngii. (Oli. 9:5) Me a Paulus er a ledu el kmo ng “mlad el kirel a Llach” e ngmillekoi el kmo ngmla mo diak el ngar cheungel a klisichel a Llach er a Moses. Ngbai mle ulterekokl a rengul el kmo ngoeak a klaumerang er ngii er a olubet e ngmla “mo ngar el kirel a Dios.”

Ng “ulekiu a Llach” e tia el tekoi a mle sebechel meketmokl. Ngmekera e uaisei? A Paulus a dirk milsaod el kmo a “chad a diak le muklemalt era urerel a llach, e ngdi kirel muklemalt er sel kloumera loumera ra Jesus Kristus.” (Gal. 2:16, BT) Nguaisei, a Llach a mla er ngii a moktek er ngii. A Paulus a dilu el kmo: “A Llach a mlor ngii el kirel el olecholt el kmo ng ngera mekngit, e di mle kirel el ngar ngii el mor sel le mei a ngelekel a Abraham, el ngikel meltib a telbiil el kirel.” (Gal. 3:19) A Llach a mileketeklii el kmo a rediak el mecherrungel el chad a diak el sebecherir el cherrungel lotireklii a Llach me te uluusbech er a cherrungel el tenget. Me a Llach a milekroleterir el mora “ngelekel a Abraham, el ngikel meltib” el Kristus. A lsekum e te mo oumerang er a Jesus Kristus e ngsebechir el muklemalt er medal a Dios. (Gal. 3:24) A Paulus a mlo mtebengii tia el tekoi e le ngoeak a Llach e ngmlo kongei e mo oumerang er a Jesus. Me a Paulus a “mlad el kirel a Llach” e mlo “ngar el kirel a Dios.” Me a Dios a mlo er ngii a klisichel er a klengar er ngii, el diak el Llach.

A Paulus a milsaod a osisiu el tekoi er a babilengel el mora rechad er a Rom. Ngdilu el kmo: “Rudam er ngak, nguaisei me kemiu a mla mad el bedul a llach luleak a bedengel a Kristus . . . Kede mla mengubet er a Llach, ele kede mlad el kirel a Llach el milengelbus er kid.” (Rom 7:4, 6, BT) Ngar tia el bades me a Galatia 2:19, e a Paulus a dimlak losaod el kirel a chad el mad el mekngit el chad er cheungel a Llach. Ngbai milsaod el kirel a ilmokl. A llach a mla mo diak a klisichel er ngii me a rebebil el uai ngii. Te mla mo mimokl er a Llach loeak a klaumerang er tir er a olubet el tengetengel a Kristus.