Mupostolo Phaula wasonegele egi: ‘Luholo ngakhalele mutumagela mukhuala, ngafuile mu ndaga yatadila mukhuala, hagula ngukhale nu monyo mukunda nu Nzambi.’—Gal. 2:19.

Ndaga mupostolo Phaula wasonegele mu verse eyi jidi gudivua nu ndaga asonegele mahungu a gu Roma mu province ya Galatiya. Aklisto ako a gu Galatiya akhalele mutegelela malongo a mambo akhalele mulongesa athu ako. Athu ene akhalele muzuela egi hagula muthu ahuluishiwe udi naye gutumagela Mukhuala wa Moize, uvi udi naye thomo gutumagele mukhuala watadila gumbiwa gu mukanda. Phaula wakhalele mujiya egi Nzambi wakhalelego luko mutoga akombeledi enji ha gumbiwa gu mukanda. Wakhalele guakotelesela nu gikhesa giagasue ha guamonesa egi malongo a athu ene akhalele a mambo nu ha gukuatesa aphangi ha gukolesa gutshigina guawo mu mulambu wa Yesu Klisto.—Gal. 2:4; 5:2.

Biblia yana monesa haphelo egi gula muthu wafua, ana jiya ndo nga gima gimoshi, ana mona nji ndo malamba. (Mulo. 9:5) Tangua Phaula wazuelele egi: ‘Ngafuile mu ndaga yatadila mukhuala,’ wakhalele mutshigina guzuela egi akhalelego luko mutuamezewa mu Mikhuala ya Moize. Uvi wakhalele mujiya egi luholo wakhalele nu gutshigina mu mulambu wa Yesu, wakhalele nu ‘monyo mukunda nu Nzambi.’

Mukhuala wa Moize wakuatesele Phaula ha gusombegesa. Luholo lutshi? Muene hakhenji wazuele egi: ‘Muthu ana tamegewago egi udi muthu wabonga mukunda nu ndaga jidi muzuela mukhuala, uvi mukunda nu gutshigina guenji gudi Yesu Klisto.’ (Gal. 2:16) Mukhuala wataganesele ndaga imoshi ya gubalega ndando. Mupostolo Phaula wawambelele Aklisto a gu Galatiya egi: ‘Mukhuala walundiwe ha gumonesa gubola haphelo uu nu tangua diajile mujigulu wa Abalahama watendelewe mu laji diene.’ (Gal. 3:19) Yadiago, Mukhuala wamonesele haphelo egi athu ashigo atagana ajiyilego gulandula gutumagela ndaga jiagasue jiana guzuela Mukhuala, hene akhalele nu funu ya mulambu watagana. Mukhuala wakuatesele athu ha gukotelese egi ‘mujigulu muene watendelewe’ yakhalele Yesu. Hene, Nzambi wajiya gutamega muthu egi udi wabonga gu meso enji gula udi musha gutshigina guenji gudi Yesu Klisto. (Gal. 3:24) Phaula wakotelesele ndaga eji jiagasue handaga Mukhuala wa Moize wamukuatesele ha gutshigina Yesu nu ha gusha gutshigina guenji gudi muene. Ngenyi Phaula ‘wafuile mu ndaga yatadila mukhuala’ nu wahetele ‘monyo mukunda nu Nzambi.’ Mikhuala yakhalelego luko gumutuameza uvi wakhalele mutuamezewa gudi Nzambi.

Phaula wazuelele nji ndaga ya luholo lumoshi mu mukanda asonegele Aklisto a gu Roma. Wazuelele egi: ‘Enue nji aphangi, muakhalele agujitshiga gu mukhuala wa Moize, uvi mulambu wa Klisto wa mijituluile gu mukhuala wene. . . . Tuakudiwe mu uhiga wa Mukhuala wene handaga tuafuile gu ndaga yakhalele gutubuisa enya bologo.’ (Lomo 7:4, 6) Hene, ha gutadila verse eyi nu mukanda wa Galatiya 2:19, Phaula akhalelego muzuelela gufua guakhalele mufua athu akhalele mutuamezewa mu Mukhuala wa Moize gula akalagala gubola. Uvi wakhalele muzuelele gukatudiwa mu uhiga. Yakotelesa egi Mukhuala wakhalelego luko mutuameze Phaula nga Aklisto ako akatudiwe mu uhiga gifua muene handaga amonesele gutshigina guawo mu mulambu wa Klisto.