Apóstol Pablo nerqa: “Noqaqa leyta juntʼasqayrayku leypaj wañorqani, ajinamanta Diospaj kausanaypaj”, nispa (Gál. 2:19).

Pabloqa chayta nerqa, ñaupa tiempopi Romamanta Galacia llajtapi kaj congregacionesman sutʼinchashaspa. Llulla yachachejkunaqa, nerqanku salvakunapajqa Moisespa Leyninpi nisqanta tukuyninta juntʼana kasqanta, chayrayku circuncidakunapuni kasqanta. Wakin cristianostaj chay nisqankuman jina kausasharqanku. Jinapis Diosqa mañana kamacherqachu, kamachisnin circuncidakunankuta. Chaytataj Pabloqa sutʼita yacharqa. Chayrayku payqa Galaciamanta hermanosman sumajta entiendechinanpaj jina sutʼincharqa. Ajinamantataj rikucherqa chay yachachiykunaqa llulla kasqanta, hermanostataj kallpacharqa Jesuspa wañuyninpi creenankupaj (Gál. 2:4; 5:2).

Bibliaqa sutʼita nin uj runa wañupojtin, manaña imata yachasqanta, nitaj imapis llakichisqanta chayri kusichisqanta (Ecl. 9:5). Pabloqa “leypaj wañorqani” nispa, nisharqa manaña Moisespa Leyninta juntʼananchu kasqanta. Astawanpis payqa sutʼita yacharqa, Jesuspa wañuyninpi creesqanrayku ‘Diospaj kausasqanta’.

Chaytaj karqa leyta juntʼasqanrayku. ¿Imajtintaj chayta ninchej? Pay sutʼincharqa: “Runaqa mana leyman jina ruwasqanraykuchu cheqan runapaj qhawasqa, manachayqa Jesucristopi creesqanrayku”, nispa (Gál. 2:16). Leyqa imapajchus karqa chayta juntʼarqaña. Pabloqa Galaciamanta hermanosman nerqa: “Leyqa churasqa karqa, runaspa sajra ruwasqasninkuta sutʼiman orqhonanpaj. Chaytaj karqa, Abrahanpa mirayninmanta kaj chayamunankama, pimanchus Diosqa sumaj imasta qonanta nerqa chay”, nispa (Gál. 3:19). Leyqa sutʼita rikucherqa runasqa pantaj runas, juchasapastaj kasqankurayku, Leypi nisqanta mana allinta juntʼayta atisqankuta. Chantapis sutʼita rikuchillarqataj uj cheqan runa, paykunarayku kausayninta qonanta necesitasqankuta. Ajinamanta Leyqa paykunata yanaparqa, “Abrahanpa mirayninmanta” kajqa, Jesús kasqanta reparanankupaj. Chayrayku Diosqa, Jesuspi creejta cheqan runapaj qhawanman (Gál. 3:24). Pabloqa cheqan runapaj qhawasqa karqa, Leynejta Jesuspa yachachisqanta japʼikusqanrayku, paypitaj creesqanrayku. Ajinamanta payqa ‘leypaj wañorqa’ ‘Diospajtaj kausarqa’. Chayrayku payqa manaña Leypa kamachiyninpichu kasharqa, manaqa Diospa kamachiyninpi.

Payqa, chayman rijchʼakojllatataj Romamanta hermanosman kayta nerqa: “Qankunapis hermanosníy, Leypajqa wañorqankichej Cristoj wañusqannejta [...]. Kunantajrí Leymanta kacharichisqaña kanchej. Imaraykuchus kamachiyninpi japʼiwarqanchej chay Leypajqa wañunchejña”, nispa (Rom. 7:4, 6). Kay versiculospi jinallataj Gálatas 2:19 versiculopi Pabloqa, mana Leyman jina juchachasqa wañunamantachu parlasharqa. Manaqa leymanta kacharichisqa kaymanta. Chayrayku Pabloqa Cristoj wañuyninpi creesqanrayku, Leypa atiyninmanta kacharichisqa karqa, jinallataj waj cristianospis.