Apóstol Pabloca: “Ñucaca, Mandashcapi ama cangapajmi, Diospaj causangapaj Mandashcapi nishcata ruranamantaca huañurcani” nircami (Gálatas 2:19).

Apóstol Pabloca cai shimicunata quillcashpaca Galaciapi caj huauqui panicunaman Moisesman cushca leyta mana pajtachina cashcatami intindichicurca. Chai tiempopica huaquin huauqui panicunaca panda crishcacunata chasquishpa quishpiringapaj Moisesman cushca leyta tucuita pajtachina cashcata, circuncisiontapish pajtachina cashcatami crircacuna. Pero Pabloca allimi yacharca Diosta sirvijcuna chai leyta ña mana pajtachina cashcata. Chaimanta chai panda yachachishcacunata ama crichun, Jesús huañushcapi feta churachunmi ayudacurca (Gálatas 2:4; 5:2).

Bibliapica huañushcacunaca ña mana imata rurai tucuncunachu, ima leytapish ña mana pajtachi tucuncunachu nishpami yachachin (Eclesiastés 9:5). Shinaca apóstol Pabloca ‘ñucaca, Mandashcapi ama cangapajmi huañurcani’ nishpaca Moisesman cushca leymanta cacharichishca cashcatami nisha nicurca. Pero paica ‘Jesús huañushcapi feta churashcamantami Diospajlla causacuni’ nircami.

¿Apóstol Pabloca imamantataj chashna nirca? Paica: “Diosca maijan runatapish leypi nishcata rurashcallamantaca cashcata ruraj shinataca mana ricunchu. Ashtahuanpish Jesucristopi crishcamantami cashcata rurajta shina ricun” nircami (Gálatas 2:16, NWT ). Shinallataj Pabloca: ‘Abrahampaj huahua huahua chayamungacama gentecuna mana allita ruracushcata ricuchingapajmi Diosca leytaca curca’ nircami (Gálatas 3:19, NWT ). Cai versocunapi nishca shinaca juchayuj runacunaca Moisesman cushca leytaca mana cabalta pajtachi tucurcacunachu. Chaimantami shuj jucha illaj runa quishpichichun minishtirirca. Moisesman cushca leyca Jesús Mesías cashcata gentecuna intindichunmi ayudarca. Chaimi Jesuspi feta churajca Diospaj ñaupajpica cashcata ruraj carca (Gálatas 3:24). Pablopish leyta intindishcamantami Jesuspi feta churarca. Chashnami paica Moisesman cushca leymanta cacharichishca carca. Ashtahuancarin Diospaj ñaupajpica cashcata rurajmi carca.

Apóstol Pabloca Romapi causaj huauqui panicunamanpish: “Ashtahuanpish cunanca huatashcata charicuj Mandashcapajta ama rurangapajca, huañushcami canchij” nircami (Romanos 7:4, 6). Cai versocunapi y Gálatas 2:19-pica Pabloca leyta mana pajtachishcamanta huañuna cashcataca mana nisha nicurcachu. Ashtahuanpish Jesuspi feta churashcamanta Moisesman cushca leymanta cacharichishca cashcatami nisha nicurca.