Tata a Paulo: “No te ture, kua mate ïa au i te ture, kia ora au i te Atua.”—Gala. 2:19.

Ta Paulo i tata, kua rotai te manako ki tana i oronga ki te putuputuanga Galatia i Roma. Kua akavareia tetai au taeake Kerititiano i reira e te au puapii pikikaa. Apii te reira aronga e e mea puapinga e rauka ai te ora, kia akonoia te Ture a Mose no te peritome. Inara kua kite a Paulo kare te Atua e anoano ana i te aronga akarongo kia peritomeia. Na roto i tetai akamārama anga taka meitaki, kua patoi aia i te au apiianga pikikaa e kua akamatutu aia i te akarongo o te au taeake kia āriki i te atinga oko o Iesu Mesia.​—Gala. 2:4; 5:2.

Karanga te Pipiria e me mate tetai tangata, kare ana tuatua e kitea. (Kohe. 9:5) Te tuatua anga a Paulo e: “Kua mate ïa au i te ture,” te karanga ra aia no te Ture a Mose kare o te reira mou iaia. Mari ra, kua papu ia Paulo no tona akarongo i te atinga oko, kua rauka te “ora [iaia] i te Atua.”

Kua rauka teia turanga ia Paulo “no te ture.” Akapeea ra? Koi oti akera aia i te akamārama e “kare ua te tangata e tika i te angaanga a te ture, i te akarongo ra ia Iesu Mesia.” (Gala. 2:16) E tika, e tuanga puapinga maata ta te Ture i akatupu. Kua akakite a Paulo ki to Galatia: “No te maata ua o te ara i paʼuia mai ei, e kia tae mai te uanga nona taua tuatua i tuatuaia maira.” (Gala. 3:19) Ae, kua akaari mai te Ture e kare i rauka ana i te au tangata ara ua nei i te akono i te reira, e kua anoano ratou i tetai atinga tiama e te mutu kore. No reira kua arataki te Ture i te tangata ki te “uanga,” ko te Mesia. Na te akarongo anga ia Iesu Mesia, ka akatikaia tetai ki mua i te Atua. (Gala. 3:24) Kua mārama a Paulo i teia manako no te mea na roto i te Ture kua rauka iaia i te āriki e te irinaki ia Iesu. I reira a Paulo i ‘mate ïa i te ture’ e kua ‘ora i te Atua.’ Kare o te Ture mana ki rungao iaia, mari ra te mana o te Atua.

Akakite katoa a Paulo i teia manako i roto i tana reta ki to Roma. “E aku au taeake, kua mate katoa kotou i te kopapa o te Mesia i te akonoanga i te ture ra . . . Kua tataraia tatou i te ture, kua mate oki te mea i mou ei tatou ra.” (Roma 7:4, 6) Akaari mai teia irava e Galatia 2:19, e kare a Paulo i tuatua ana no te tangata ara tei akautungaia i raro i te Ture. Mari ra, te taiku ra aia i te turanga akarangatira anga. Kare o te Ture mana ki runga iaia e tetai pae mei iaia rai. Kua akarangatiraia ratou e te akarongo i roto i te atinga oko o Iesu.