O Pavle pisinđa: „Odolese so ićerđum man ko Zakon, me muljum premalo Zakon te bi živinava e Devlese“ (Gal. 2:19).

Akala lafija hine povezime e glavno temaja kolatar o Pavle pisinđa e skupštinenđe ki rimsko provincija, ki Galatija. Uduri upro disave hrišćanija utičinđa odova so sikavđe o hovavne učiteljija. Akala učiteljija sikavđe so aso spasenje valjani te šunel pe e Mojsijeso zakon, a posebno o zakon ando obrezanje. Ama, o Pavle đanđa so o Devel više na rodela ando pe sluge te ićeren pe ko odova Zakon. Ov vaćerđa olencar uverljivo hem mothovđa lenđe so odova so on sikavena tano hovavno hem zorjaćerđa pe phralengi vera ki otkupno žrtva ando Isus Hrist (Gal. 2:4; 5:2).

Ki Biblija pisini so ked neko merela, ov više na đanela ništa hem više ništa našti te utičini upro leste (Prop. 9:5). Ked o Pavle phenđa „me muljum premalo Zakon“, ov mislinđa ko odova so e Mojsijeso zakon više na hine le vlast upro leste. O Pavle hine sigurno so odolese so verujinđa ki otkupno žrtva, ov počminđa te živini „e Devlese“.

Akija promena alji sebepi so ov ićerđa pe ko Zakon. Sose šaj te phena odova? Hari angleder odova, ov objasninđa „so o manuš na proglasini pe pravedno sebepi odova so ćerela sose ićeri pe ko Zakon, nego sebepi i vera ko Isus Hrist“ (Gal. 2:16). Ama, o Zakon hine le pobari uloga. O apostol Pavle objasninđa e hrišćanenđe ki Galatija: „Ov hine dindo kasnije te šaj amare grehija te oven očigledna, đi na avela o potomstvo kase tano dindo o obećanje“ (Gal. 3:19). O Zakon jasno mothovđa so o nesavršena, grešna manuša našti savršeno te ićeren pe ko Zakon hem so olenđe valjani savršeno žrtva. Ađahar, o Zakon legarđa e manušen đi „o potomstvo“, o Hrist. Okolen kola mothovđe vera ko Isus Hrist, o Devel šajinđa te proglasini soj tane pravedna (Gal. 3:24). O Pavle šaj hine te ovel proglasimo pravedno, odolese so o Zakon pomožinđa lese te prihvatini e Isuse hem te verujini upro leste. Ađahar, ov mulo „premalo Zakon“ hem počminđa te živini „e Devlese“. O Zakon više na hine le vlast upro leste, ama o Devel hine le.

Diso slično o Pavle pisinđa hem e hrišćanenđe ko Rim: „Tumen, me phralja, prekali e Hristesi žrtva hijen oslobodime ando Zakon... Akana hijam oslobodime ando Zakon sose ov više na ograničini amen“ (Rimlj. 7:4, 6). Akala stihija hem o Galatima 2:19 mothovena so o Pavle na phenđa so mulo sar grešniko sebepi so o Zakon osudini le. Umesto odova, ov vaćerđa soj tano oslobodimo ando Zakon. O Zakon više na hine le vlast ni upro oleste ni upro avera. On hine oslobodime odolese so verujinđe ki e Isusesi otkupno žrtva.