Ο Παύλος γραφιντάς: «Αντράλ κατά νόμος μουλόμ κο πράγματα σο τθερένα τι κερέν ι νομόσαρ, για τι αβάβ τζουβντό ι Ντεβλέσκε».​—Γαλ. 2:19.

Μερικοί Χριστιανοί κο κχανγκιριά σο ισινέ κι Γαλατία ασουνένας οντουλέν σο σικλιαρένας ψέματα. Οντουλά τζενέ βακερένας ότι, για τι σώντιβελ εκ τζενό, έπρεπε τι κερέλ οντουλά σο βακερέλας ο Μωσαϊκός Νόμος, ντα πιο μπουτ ι περιτομή. Ο Παύλος όμως τζανέλας ότι ακανά ο Ντεβέλ να μανγκέλας οντουλένταρ σο πακιάνας Λέστε τι κερέν περιτομή. Οντουλέντζαρ σο βακερντάς, ο Παύλος σικαντάς ότι ανταβά σικλιαριπέ ισινέ ψέματα ντα κερντάς πιο ζουρανί ι πίστη ι πφραλένγκι κι θυσία κι Ιησού Χριστόσκι. (Γαλ. 2:4· 5:2) Καζόμ εξηγίνελας σόσκε να χρειαζίντιβελας τι ντεν καν κο Μωσαϊκός Νόμος, γραφιντάς ο λάφια σο ισί κο Γαλάτες 2:​19.

Η Γραφή βακερέλα ότι κάνα μερέλα εκ τζενό να αγαβέλα τίποτα ντα να επηρεάντιβελα καέκ πραγμάσταρ. (Εκκλ. 9:5) Κάνα ο Παύλος βακερντάς: «Μουλόμ κο πράγματα σο τθερένα τι κερέν ι νομόσαρ», μανγκέλας τι βακερέλ ότι ο Μωσαϊκός Νόμος να επηρεάνελας λέσκι ζωή. Οκιά μπάνταρ, ο Παύλος ισινέ σίγουρος ότι, επειδή πακιάλας κι θυσία κι Ιησούσκι, “αβιλόας τζουβντό ι Ντεβλέσκε”.

Ανταβά αβιλό-πες κο Παύλος «αντράλ κατά Νόμος». Σαρ; Ο Παύλος βακερντάας ότι «ο τζενό να βακέρντιβελα δίκαιος επειδή κερέλα οντουλά σο βακερέλα ο νόμος, αλλά σάντε επειδή πακιάλα κο Ιησούς Χριστός». (Γαλ. 2:​16) Ισί μπαγιά ότι ο Νόμος κερντάας κάτι σημαντικός. Ο Παύλος βακερντάς κο Γαλάτες: «Ντιντιλό για τι σικάντιβεν ο λάθη, μέχρι τι αβέλ ο προσάγγονος σο λέστε ντιντιλίας η υπόσχεση». (Γαλ. 3:​19) Βα, ο Νόμος σικαβέλας ότι ατελείς ντα αμαρτωλοί τζενέ ναστί κερένας ντιπ λατσσές οντουλά σο βακερέλας ο Νόμος ντα ότι χρειαζίντιβενας εκ τέλεια θυσία. Οτθάρ, ο Νόμος βοηθιντάς ι τζενέν τι αγαβέν ότι ο Ιησούς ισί ο “προσάγγονος”. Άμα εκ τζενό πακιάλας κο Ιησούς Χριστός, μπορίνελας τι βακέρντιβελ δίκαιος κατά Ντεβέλ. (Γαλ. 3:​24) Ανταβά αβιλό-πες κο Παύλος-ντα επειδή βοβ αντράλ κατά Νόμος δεχτιντάς ι Ιησούς ντα πακιασάλο λέστε. Αντικάς, ο Παύλος “μουλό κο πράγματα σο τθερένα τι κερέν ι νομόσαρ” ντα αβιλό «τζουβντό ι Ντεβλέσκε». Ακανά να ντέλας καν κο Νόμος, αλλά κο Ντεβέλ.

Ο Παύλος βακερντάας πάλι κάτι ασακό κι επιστολή σο γραφιντάας κο Ρωμαίους. «Ακανά ισινάμ ελεύθεροι κατά Νόμος, σόσκε να κερέλα-αμέν κουμάντος». (Ρωμ. 7:4, 6) Άρα, κο εδάφιος Γαλάτες 2:​19, ο Παύλος να βακερέλας εκχέ τζενέσκε σο μερέλα σαρ αμαρτωλός τελάλ κατά Νόμος. Οκιά μπάνταρ, βακερέλας ότι ισινέ ελεύθεροι. Ο Νόμος ακανά να επηρεάνελας ούτε λες ούτε ι γιαβερέν σο ισινέ σαρ λέστε. Ελευθερωσάλεας αντράλ κατά πίστη σο τθερένας κο λύτρος κι Χριστόσκο.