O Pavel scriisardea: „Prin i legea, mulem caring i legea, caște avav jiuvindo caring o Del”. (Gal. 2:19)

So scriisardea o Pavel sas-les phanglimos iecha ideaia importanto cai phendea-la le congregațienghe anda i provincia romano Galatia. Chichiva creștini anda cado than sas-le influențime catar le sicaitori neciace cai phenenas că i salvarea daștil te avel posibilo numai cana si respectime i Legea mozaico hai i circumcizia. Tha o Pavel jianelas că o Del ci mai manghelas catar lesche slujitori te cheren i circumcizia. Vo andea argumentea lașe contra cadal sicaimata neciace hai zuriardea o pachiamos le phralengo andi jertfa de răscumpărare le Isus Cristososchi. (Gal. 2:4; 5:2)

I Biblia phenel claro că iech manuș cai merel ci mai jianel chanci hai so întâmplol-pe pașa leste ci afectil-les. (Ecl. 9:5) Cana phendea „mulem caring i legea”, O Pavel camlea te sicavel că i legea mozaico ci mai afectilas-les, sau ci mai sas-la zuralimos pa leste. Vo pachialas zurales că, prin lesco pachiamos andi jertfa de răscumpărare le Isusoschi, cărdilea „jiuvindo caring o Del”.

Cado paruimos avilea „prin i Legea”. Sar? O Pavel phendea de mai anglal „că o manuș nai-lo declarime orta prin le buchia la legeache, tha numai prin o pachiamos ando Isus Cristos”. (Gal. 2:16) Si ciaces, la Legea sas-la iech rolo importanto. O Pavel phendea caring le galateni că i Legea „sas-li șiuti caște aven sicade le buchia nasul, ji cana avileas te avel i descendența casche sas cărdi i promisiunea”. I Legea sicavelas claro că le manușa imperfecți hai păcătoși, ci daștinas te respectin i legea ande iech modo perfecto hai sas-le nevoia catar iech jertfa perfecto caște avel dini iech data anda sea o timpo. (Gal. 3:19) Cadea că, i Legea îngărelas le manușen ca i ‘descendența’, adică ca o Isus Cristos. O Del daștilas te phenel că iech manuș si orta pi baza le pachimasco ando Isus Cristos. (Gal. 3:24) O Pavel sas-lo declarime orta anda codoia că prin i legea acceptisardea le Isusos hai pachiaia ande leste. Cadea că, o Pavel ‘mulea caring i Legea’ hai cărdilo „jiuvindo caring o Del”. La Legea ci mai sas-la nici iech zuralimos pa leste, tha le Devles sas-les.

O Pavel phendea iech ideea sar cadaia ando lil caring le creștini anda Roma. „Mânre phrala „arăslean mule caring i Legea prin o corpo le Cristososco . . . Samas eliberime tela i Legea, anda codoia că muleam caring so încărelas-ame phangle”. Vi ande cadal versetea hai vi ande Galateni 2:19, o Pavel ci dea duma anda leschi condamnarea tela i Legea sar păcătoso cai meritilas o merimos, tha anda iech eliberarea. (Rom. 7:4, 6). La Legea ci mai sas-la nici iech zuralimos pa leste hai pa aver. Von sas-le eliberime prin lengo pachiamos andi răscumpărarea le Cristososchi.