Paulu alemba: ‘Thangwi ya mwambo, ine ndafa kuna mwambo, toera ndikhale maso kuna Mulungu.’—Agal. 2:19.

Paulu alembera mafala anewa mpingo wa ku Galasya. Thangwi Akristu anango akhakhuyiwa na apfundzisi authambi. Thangwi amuna anewa akhapfundzisa kuti toera munthu apulumuke akhafunika kubvera mwambo wa Mose, makamaka unalonga pya kusidzwa. Mbwenye Paulu akhadziwa kuti Mulungu nee akhaphembabve anthu kuti asidzwe toera apulumuswe. Natenepa iye apanga Akristu kuti pipfundziso pyenepi pikhali pyauthambi, pontho aaphedza toera akhulupire ntsembe yaciomboli ya Yezu Kristu.—Agal. 2:4; 5:2.

Bhibhlya isapangiza pakweca kuti munthu wakufa nee asadziwa cinthu, pontho iye nee asakhuiwa na pinthu pinacitika. (Koel. 9:5) Pidalonga Paulu kuti: ‘Ine ndafa kuna mwambo, iye akhafuna kulonga kuti mwambo wa Mose nee ukhaphatabve basa kuna iye. Mbwenye iye akhali na cinyindiro consene cakuti ali “maso kuna Mulungu” thangwi yakukhulupira kwace ntsembe yaciomboli.

Paulu nee akhaonabve “mwambo” ninga wakufunika kakamwe. Thangwi yanji? Thangwi iye alonga kuti: ‘Munthu asaoniwa wakulungama basi ene thangwi yakukhulupira Yezu Kristu, tayu thangwi yakucita pinthu pinaphembwa na mwambo.’ (Agal. 2:16) Mwandimomwene, Mwambo wakwanirisa cinthu cakufunika kakamwe. Paulu alonga thangwi ya cinthu ceneci kuti: ‘Iwo waperekwa toera kupangiza pakweca madawo, mpaka kufika mbeu idacitirwa pikiro ineyi.’ (Agal. 3:19) Mwandimomwene, Mwambo wapangiza pakweca kuti anthu akusowa ungwiro na akudawa nee mbadakwanisa kuubvera munjira yadidi, natenepa iwo akhafunika ntsembe yaungwiro. Na thangwi ineyi, Mwambo waphedza anthu toera kudzindikira kuti Yezu akhali ‘mbeu.’ Munjira ineyi, munthu angakhulupira ntsembe ya Yezu Kristu anakwanisa kukhala wakulungama kuna Mulungu. (Agal. 3:24) Natenepa Paulu aoniwa wakulungama thangwi kubulukira mu Mwambo, iye atawira mbakhulupira Yezu. Pyenepi pisapangiza kuti “thangwi ya mwambo” Paulu “afa” mbakhala “maso kuna Mulungu.” Natenepa iye nee akhatongwabve na Mwambo, mbwenye akhatongwa na Mulungu.

Mukupita kwa ndzidzi, Paulu alonga mafa mabodzi ene kuna Akristu a ku Roma. Iye alonga: “Abaleanga, imwembo mwafa ku Mwambo kubulukira ku manungo a Kristu . . . Mbwenye cincino tasudzulwa ku Mwambo thangwi iwo nee usatipingizabve.” (Aroma 7:4, 6) Pa lemba ineyi na pa lemba ya Agalata 2:19, Paulu nee akhalonga pyakufa mu Mwambo ninga nyakudawa. Mbwenye iye akhalonga pya kusudzulwa mu Mwambo unoyu. Natenepa Mwambo nee ukhalibve wakufunika kakamwe kuna Paulu na Akristu anango. Iwo asudzulwa thangwi yakukhulupira ntsembe yaciomboli ya Kristu.