Paul atene: “Na batango ndia, mbi kui awe tongana a ngbâ gï ndia ni, si mbi kiri mbi duti na fini ndali ti Nzapa.”—aGal. 2:19.

Atënë ti Paul so ague oko na kota tënë so lo ye ti fa na acongrégation ti Galatie, so ayeke mbeni kodro-komanda ti Rome. Azo ti fango ye ti wataka ayeke sara lani ngangu na ndö ti ambeni Chrétien ti kâ. Azo so ayeke fa lani so ti tene zo awara salut, a lingbi lo sara ye alingbi na Ndia ti Moïse, mbilimbili ndia ti fango ganza. Me Paul ahinga lani so Nzapa ahunda encore na awakua ti lo ape ti fâ nganza. Paul asara tënë na aita na mbeni fason so asara si ala hinga so atënë so ayeke mvene, nga lo sara si mabe so aita ayeke na ni na ye so Jésus Christ afuta ti zi azo akpengba.—aGal. 2:4; 5:2.

Paul atene: “Mbi kui awe tongana a ngbâ gï ndia ni.” Lo ye ti tene nyen? Bible atene polele so tongana mbeni zo akui awe, aye so ayeke passé na terê ti lo, lo hinga ye oko dä ape nga a sara lo ye oko ape (Zo-ti. 9:5). Tongaso, Paul aye ti tene so Ndia ti Moïse ayeke na ngangu na ndö ti lo encore ape. Me Paul ahinga biani so grâce na mabe ti lo na ye so a futa ti zi azo, “lo kiri [lo] duti na fini ndali ti Nzapa.”

Ndia ni asara si dutingo ti Paul achangé. Na lege wa? Lo londo ti fa ndani, lo tene “a yeke diko mbeni zo tongana zo ti mbilimbili ndali ti akusala ti ndia pëpe, me gï ndali ti mabe ti lo na Jésus Christ”. (aGal. 2:16). A yeke tâ tënë so Ndia asara lani mbeni ye so ayeke kota mingi. Paul atene lani na aGalate so Nzapa amû lani Ndia na azo ti lo “ti tene a fa akengo ndia na gigi, juska hale ni asi, lo so a mû zendo ni na lo.” (aGal. 3:19). Ndia ni afa lani polele so azo so ayeke mbilimbili-kue ape so siokpari ayeke na terê ti ala alingbi pëpe ti sara ye alingbi na Ndia ni tâ na lege ni, nga so ala bezoin ti tene a mû mbeni ndangba sandaga so ayeke mbilimbili-kue ndali ti ala. Tongaso, Ndia amû lani maboko na azo ti hinga so Jésus la ayeke “hale ni”. Tongana mbeni zo amä na bê na Jésus Christ, Nzapa ayeke diko lo zo ti mbilimbili (aGal. 3:24). A diko Paul zo ti mbilimbili ndali ti so na lege ti Ndia lo yeda na Jésus nga lo mä na bê na lo. Na ngoi ni so, Paul ‘akui awe tongana a ngbâ gï ndia ni’ na lo kiri lo “duti na fini ndali ti Nzapa.” Ndia ayeke lani na ngangu na ndö ti lo encore ape, me Nzapa la ayeke na ngangu na ndö ti lo.

Paul atene mara ti tënë tongaso na yâ ti lettre so lo tokua na aChrétien ti Rome. Lo tene: “Aita ti mbi, na lege ti terê ti Christ ala nga kue ala kui na lege ti Ndia awe . . . A zi e na gbe ti Ndia awe, ndali ti so e kui awe na lege ti ye so angbâ ti gbu e lani ngangu.” (aRom. 7:4, 6). Versê so nga na aGalate 2:19 afa so Paul ayeke sara lani pëpe tënë ti ngbanga ti kuâ so a dë na li ti lo ndali ti so lo sara ye pëpe alingbi na Ndia. Me lo yeke sara lani tënë ti zingo lo. Ndia ayeke lani na ngangu encore ape na ndö ti lo nga na amba ti lo aChrétien so, legeoko tongana lo, a zi ala grâce na mabe so ala yeke na ni na ye so Christ afuta ti zi azo.