Hoy Paoly: “Ty lalàna ro nahavy ahy ho maty laha amy ty lalàna, amy zay aho mba ho velo ho ahi-Ndranahary.”​—Gal. 2:19.

Misy ifandrambesany amy hevitsy niresahini-Paoly tamy fiangonani-Roma amy faritsini-Galatia any raha nisoratiny io. Nisy tamy Kristiana tao reo nivoataoni-mpampianatsy sandoky. Nampianatsy rozy hoe tsy ho avotsy ty olo raiky laha tsy manaraky ty Lalànani-Mosesy, sirtò mikasiky savatsy iny. Fe nihaini-Paoly fa tsy nitaky ani-zay amy ty mpanompony sasy Ndranahary, ka niporofoeny fa diso fampianara zay. Tena naharesy lahatsy ty fanazavany ka nihanitombo ty finoani-rahalahy reo ty sorom-panavota nataoni-Jesosy Kristy.​—Gal. 2:4; 5:2.

Mazava ty raha volanini-Baiboly hoe lafa maty ty olo raiky, le tsy mahay ndre ino ndre ino. (Mpito. 9:5) Ka lafa nivola zany Paoly hoe “maty [aho] laha amy ty lalàna”, le ta hivola ie fa tsy misy heriny aminy sasy ty Lalànani-Mosesy. Natoky Paoly fa lasa “velo ho ahi-Ndranahary” ie satria nino ty vilim-panavota.

Nanova ty fiainani-Paoly “ty lalàna.” Manao akory zao? Nanazava ie hoe “ty finoa ani-Jesosy avao ro azo anambarà olo raiky ho marina, fa tsy ty asani-lalàna.” (Gal. 2:16) Tena nahavita raha bevata vatany ty Lalàna. Hoy Paoly tamy Galatianina reo: “Namea koa raha io mba ho hita soa ty tsy fanoriha lalàna, zisiky hiaviani-taranaky, azy nanaova ani-fampitamana iny.” (Gal. 3:19) Hita hoe tsy vitan’olombelo tsy lavorary vatany ty manaraky soa ty raha volanini-Lalàna. Nila soro lavorary rozy. Ty Lalàna zany ro nanampy ty olombelo hahay hoe Jesosy “taranaky” io. Lafa mampiseho finoa ani-Jesosy Kristy ty olo raiky vo hambara-Ndranahary ho marina. (Gal. 3:24) Nambara ho marina zany Paoly satria ty Lalàna ro nahavy azy naneky noho nino ani-Jesosy. Nimaty Paoly tamy zay laha amy ty lalàna fe nivelo ie tamy Ndranahary. Tsy nisy heriny taminy sasy ty Lalàna fa Ndranahary ro nisy heriny taminy.

Niresaky hevitsy mitovy amy zay Paoly lafa nanoratsy ho ani-Romanina. Nivola ie hoe “afaky amy Lalàna tsika”, satria fa tsy misy heriny amintsika sasy ty lalàna. (Rom. 7:4, 6) Tsy resaky fahafatesa vokatsini-fahotà zany niresahini-Paoly tamy Galatianina 2:19 io, fa fahafaha. Tsy misy heriny aminy noho amy Kristiana hafa rey sasy ty Lalàna. Nana fahafaha rozy satria nino ty sorom-panavotani-Kristy.