Na tusi Paulo: “Na ou oti i le tulafono ona o le tulafono, ina ia ou ola mo le Atua.”​—Kala. 2:19.

Na fesootaʻi le mea na tusi atu ai Paulo ma le manatu tāua na ia talanoa atu ai i faapotopotoga i Kalatia, le itumalo o Roma. Na taaʻina nisi Kerisiano i inā e faiaʻoga pepelo. Na aʻoaʻo e na faiaʻoga, ina ia maua le faaolataga e tatau i se tasi ona usitaʻia le tulafono a Mose, aemaise le peritomeina. Ae na iloa e Paulo e lē o toe ola Kerisiano i lalo o le tulafono a Mose, lea e manaʻomia ai ona peritomeina. Na talanoa atu Paulo i se auala e faatalitonu ma faamaonia ai le pepelo o na aʻoaʻoga, ma na faamalosia ai le faatuatua o uso i le taulaga togiola a Iesu Keriso.​—Kala. 2:4; 5:2.

O loo faamatalaina manino i le Tusi Paia pe a oti le tagata, e lē toe iloa se mea. (Fai. 9:5) Ina ua faapea mai Paulo: “Na ou oti i le tulafono,” na ia uiga atu e lē o toe saisaitia o ia i lalo o le Tulafono a Mose. Ae na mautinoa e Paulo, o lona faatuatua i le taulaga togiola, na ia ʻola ai mo le Atua.’

O le suiga i le tulaga o Paulo na māfua “ona o le tulafono.” E faapefea? Na faatoʻā uma lava ona ia faamatala atu “e taʻuamiotonuina le tagata, e lē ona o galuega o le tulafono, ae ona o le faatuatua iā Keriso Iesu.” (Kala. 2:16) O le mea moni, na faataunuuina e le Tulafono se mea e sili ona tāua. Na faamatala atu e Paulo i faapotopotoga i Kalatia: “Na faaopoopo mai lea [o le Tulafono] ina ia faaalia ai solitulafono seʻia oo mai le fanau na folafola i ai.” (Kala. 3:19) Ioe, na manino mai i le Tulafono, e lē mafai e tagata lē lelei atoatoa ma agasala ona tausia atoatoa le Tulafono, ma na latou manaʻomia se taulaga faaiʻu e lelei atoatoa. O lea, o le Tulafono na taʻitaʻia atu ai tagata i “le fanau,” o le Keriso lea. O le faaalia o le faatuatua iā Iesu Keriso, e mafai ai ona taʻuamiotonuina se tasi e le Atua. (Kala. 3:24) Na faia e Paulo lenā faaiʻuga, ona o le Tulafono na mafai ai ona ia talia ma faatuatua iā Iesu. O lea la, na ʻoti Paulo i le tulafono’ ae “ola mo le Atua.” Ua lē o toe pule ai le Tulafono iā te ia ae o le Atua.

Na faapena foʻi le manatu na tusi atu ai Paulo i Kerisiano i Roma. “Oʻu uso e, ua faapena foʻi ona outou oti e tusa ma le Tulafono i le tino o Keriso . . . Ua tuusaʻoloto i tatou mai i le Tulafono, ona ua tatou oti i le mea na taofia ai i tatou.” (Roma 7:4, 6) I lenā mau ma le Kalatia 2:19, e lē o uiga atu Paulo ua faasalaina o ia i le oti o se tagata agasala i lalo o le Tulafono. Ae na uiga atu o ia i le saʻoloto mai i le Tulafono. Ua lē o toe saisaitia o ia ma isi i le Tulafono. Na faasaʻolotoina i latou ona o le faatuatua i le togiola a Keriso.