Poolo afunaka ante: ‘Lá kɛnɛ kelendana l’ɛlɛmbɛ lemi lambovɔ l’ɛlɛmbɛ,’ djɛ lemi ndjala la lowiko le Ndjambe.’​—Nga. 2:19.

Kɛnɛ kefunisa Poolo k’okanaki l’ikanyi yɛ djonyi yɛ ndafunela ntshumano djelá Ɔrɔma djelá prɔvɛnsɛ kɛ Ngalatiya. Akristo amɔtshi wel’eteyi watshindamaki má elakanyelo w’engolo. Anto wasɔ wálakanyɛki ambɔ djɛ mba ewiko ngo nɛmɛyɛ Ɛlɛmbɛ wɛ Mɔsɛ pekapeka wopelo wɔ ntɛtɔ. Koko Poolo ewaki ante Ndjambe apɔɔlɔmbaka Akristo dj’iwɔ ndjopa ntɛtɔ. Má nkamba l’ekanedji kɛ yimba kɛ wɔlɔ efula kɛsɔ, nde atonaka elakanyelo w’engolo wɛsɔ edjinge akembɛka Akristo dj’iwɔ ndjala la djawo l’oshinga wɔ mbendo wɔ Yeso Kristo.​—Nga. 2:4; 5:2.

Bible ntepelaka papoo ante, winá w’onto ovɔnde, nde apewaka kaanga nkambo mɔ edjinge apatshindama kaanga má nkambo mɔ djenanghema. (Los. 9:5) Winá wɔ Poolo ndatepela ante: ‘Lemi lambovɔ l’ɛlɛmbɛ,’ nde akɔpaka ntepela ante nde apalekɔ lonkina l’anse k’Ɛlɛmbɛ wɛ Mɔsɛ. Koko, Poolo ayalaki l’eshikikelo ante má djawo djɛnde t’oshinga wɔ mbendo, nde ‘ayalaka la lowiko me Ndjambe.’

Lá kɛnɛ kelendana l’ɛlɛmbɛ’ ndeke lowiko lɔ Poolo iyatshikitana. Lá wopo wɔkɔnge? Nde asipisoyɛka ante, ‘onto ndɔsamaka etengo onto wɔ wɔlɔ ape ngo má nanghedji dj’ɛlɛmbɛ koko má djawo djelekɔ lande te Yeso Kristo.’ (Nga. 2:16) Koko, Ɛlɛmbɛ wayalaki l’okoma ɔmɔtshi wɔ djonyi efula. Poolo asipisoyɛka ase Ngalatiya ante: ‘Ɛlɛmbɛ wekotshamaka djɛ mposɛ nyɛtshi lá ntshɛkɛ tii winá w’oyalisa ladjɛ ndjɛ inkanola kanga l’iyalake daka.’ (Nga. 3:19) Ee, Ɛlɛmbɛ wɛnyɛka papoo djɛ anto wapalekɔ djɔ edjinge walekɔ ananghi y’evunga, wapakoke nɛmɛyɛ Ɛlɛmbɛ lá yopo yɛ djɔ. Edjinge wɛnyɛka lonkina ambɔ wayalaki la djonyi dj’olambo wɔ djɔ. Djɛkondeke Ɛlɛmbɛ wɛlɔndjɛka anto te ‘inkanola’ ntepela ente Kristo. Má ndjala la djawo te Yeso Kristo, onto nkoka ndɔsama etengo onto wɔ wɔlɔ me Ndjambe. (Nga. 3:24) Poolo atepelaka nghɔsɔ mande m’Ɛlɛmbɛ nde awolaka edjinge ayalaka la djawo te Yeso. Lá yopo yɛsɔ ndeke Poolo ‘ndavu lá kɛnɛ kelendana l’ɛlɛmbɛ edjinge ndayale la lowiko me Ndjambe.’ Ɛlɛmbɛ wetayala la nkfulu lonkina ladjiko djɛnde, koko Ndjambe.

Poolo ɛnyɛka ikanyi yɛkɔ imɔ l’onkanda wɔ ndafunela ase Ɔrɔma ante: ‘Wananyɔ edjinge nyo nyoyalaka anto wambovɔ lá kɛnɛ kelendana l’Ɛlɛmbɛ má lotshimbo lɔ demba djɛ Kristo iso tombotshungɔ m’Ɛlɛmbɛ mánde iso tombovɔ lá kɛnɛ k’isakowama.’ (Ɔrɔ. 7:4, 6) Vɛrse djɛnɛ edjinge Ngalatiya 2:19, nyɛnyɛ djɛ Poolo atatepela lá nkambo djɛ mvɔ etengo onanghi w’evunga lá nkilika Ɛlɛmbɛ koko nde atepelaki lá wopo wɔ ndatshungɔ m’Ɛlɛmbɛ. Ɛlɛmbɛ wetayala lonkina la nkfulu ladjiko djɛnde kana ladjiko dj’anto ankina wayalisa etengo nde. Iwɔ watshungɔka mpeyi ngo má djawo djɛwɔ tá oshinga wɔ mbendo wɔ Kristo.