Mpoolo bafundjile’shi: “Ku mwiya, ne mufwe ku mwiya, bwa’shi ngikale na muwa kwi Efile Mukulu.”​—Nga. 2:19, Esambi dipya 2015.

Mwanda ubadi Mpoolo mufunde ubadi wipushene na mwanda ubadi alungula tukongye twa mu Ngalatea, province a mu Loma. Bangi bena Kidishitu abadi abalondo binangu bya balongyeshi ba madimi. Bano balongyeshi, abadi abalongyesha’shi bwa kupeta kipandjilo, abitungu muntu akokyele Mwiya wa Moyise, bikishekishe wa kusadjibwa. Anka, Mpoolo badi auku’shi Efile Mukulu takya kamika’shi balangwidi baye basadibwe. Badi mwakule na kushinkamisha koso, aye nkulesha patoka’shi aa malongyesha a madimi, akupu aye nkunyingisha lukumino lwa bakwabo bena Kidishitu mu mulambu wa nkulo wa Yesu Kidishitu.​—Nga. 2:4; 5:2.

Bible alesha patoka’shi su muntu bafu, t’auku kintu su nkimune, na ta kwi kintu su nkimune ki na bukitshishi kwadi. (Mul. 9:5) Pabakwile’shi: “Ne mufwe ku mwiya,” Mpoolo badi akyebe kwamba’shi, Mwiya wa Moyise taukina dingi bukitshishi mu muwa waye. Anka, Mpoolo badi mushinkamishe’shi lukumino lwaye mu mulambu wa nkulo, ‘mwikale na muwa kwi Efile Mukulu.’

Mwiya ubadi ukwashe Mpoolo bwa kushintuluka. Mu mushindo kinyi? Kyakatuka mu kupatula’shi, ‘muntu tamubingishiibwe pa mwanda wa bikitshino bya mwiya, anka penda pa lukumiino mwi Yesu Kidishitu.’ (Nga. 2:16, Esambi dipya 2015) Eyendo, Mwiya ngukite mwanda wi na muulo. Mpoolo badi mupatulwile bena Ngalatea’shi: ‘Mufubo wao [Mwiya] ubádi wakulêsha bi bubi. Ubádi kwanka mpâ na pa kufika kwa yawa . . . balailwe wawa mulayilo.’ (Nga. 3:19, EEM) Binyibinyi, Mwiya nguleshe patoka’shi bantu bakutwe kupwidjika, basha milwisho, ta mbalombene kukokyela Mwiya mu mushindo upwidjikye nya, na’shi be na lukalo lwa mulambu upwidjikye. Byabya, Mwiya ubadi ukunkushe bantu mpa na kwi “yawa . . . balailwe wawa mulayilo,” Kidishitu. Apalesha muntu lukumino mwi Yesu Kidishitu, Efile Mukulu mulombene kumumona bu mululame. (Nga. 3:24) Mpoolo badi mwakule byabya mwanda, ku bukwashi bwa Mwiya, nyi kubadi mukumine na kulesha lukumino mwi Yesu. Kunyima kwa byabya, Mpoolo badi “mufwe ku mwiya” na aye ‘nkwikala na muwa kwi Efile Mukulu.’ Mwiya taubadi dingi na bukome kwadi, anka Efile Mukulu.

Mpoolo badi mwakule mwanda wi bino mu mukanda ubadi mufundjile bena Loma. Bafundjile’shi: “Bakweu, anwe namu, nubaadi bayipayiibwe ku mwiiya ku mbidi ya Kidishitu . . . anka binobino tubaangulwa ku mwiiya, paatwe kwikala bafwe mu kiakia akikalanga kitukwate.” (Lom. 7:4, 6, EEM) Mu uno verse na mu Bena-Ngalatea 2:19, ayilesha’shi Mpoolo ta badi akwila kufwa bu basha milwisho mu Mwiya nya. Anka badi akwila kwikala bulungatu. Mwiya ta ubadi dingi na bukitshishi kwadi na kwi bangi nya. Lukumino mu mulambu wa Kidishitu ubadi wibekashe bulungantu.